Президент Шавкат Мирзиёев 2 сентябрь куни Ислом Каримов номидаги илмий-маърифий ёдгорлик мажмуасига ташриф буюриб, Биринчи Президент ҳайкали пойига гулчамбар қўйди ва унинг хотирасига ҳурмат бажо келтирди. Бу ҳақда давлат раҳбарининг матбуот хизмати хабар берди.
Президент Шавкат Мирзиёевнинг қарорига мувофиқ, Ислом Каримов вафот этган 2 сентябрь санаси Хотира куни сифатида белгиланган. Бу кунда жамоатчилик йиғилиб, Биринчи Президентни ёд этиш эзгу анъанага айланган.
Маълум қилинишича, Ислом Каримов номидаги илмий-маърифий ёдгорлик мажмуасига ташриф давомида Қуръон тиловат қилинган.
Шавкат Мирзиёев истиқлолнинг 30 йиллик байрамига бағишланган тантанали маросимда Ислом Каримов Ўзбекистон мустақиллигини эълон қилиб, тарихнинг энг мураккаб ва оғир даврларида давлатни бошқарганини таъкидлаган.
«Ушбу хотира тадбири ҳам халқимизнинг Биринчи Президентга ҳурмати ифодасидир. Маросимда Олий Мажлиси Сенати ва Қонунчилик палатаси, Президент Администрацияси, Вазирлар Маҳкамаси, вазирлик ва идоралар, пойтахт жамоатчилиги вакиллари ҳам иштирок этди», — дейилади хабарда.
Шунингдек, Ислом Каримовнинг Самарқанд ва Қарши шаҳарларидаги ҳайкаллари пойига ҳам гуллар қўйилган.
Изоҳ (0)