Британия расмийлари Жеронимо лақабли саккиз ёшли альпакада йирик шохли қорамолларда учрайдиган сил касаллиги аниқлангани сабаб уни ўлдиришга қарор қабул қилгани тўғрисида хабар берилганди. Esquire’нинг ёзишича, аҳолининг норозилигига қарамай, альпака барибир ўлдирилган.
Ҳайвонни инфекция тарқатиши мумкинлиги хавфи сабаб ўлдириш бўйича қарор 4 сентябрга қадар амалда эди, бироқ унинг эгаси Хелен Макдональд буни мустақил амалга оширишни истамаган. Жеронимони ўлдириш учун унинг уйига Буюк Британия Атроф-муҳит ва қишлоқ хўжалиги департаменти ходимлари полиция ҳамроҳлигида келган. Норозилик намойишчилари охирги марта қотилликнинг олдини олишга уринишганида уни фермадан олиб чиқиб кетишган.
Хелен Макдональд Жеронимони Янги Зеландиядан Британияга 2017 йилда олиб келган, бироқ силга топширган иккита тести ҳам ижобий чиққани сабаб мамлакатга келганидан буён карантинда сақланган.
Макдональд Жеронимонинг тестларига шубҳа билдириб, ҳайвон таҳлиллардан олдин силга эмланган бўлса, ёлғон натижаларни чиқариши мумкинлигини таъкидлаган. Жеронимо ушбу инфекцияга қарши эмланган. Янги Зеландияда топширилган тестлар жавоби салбий чиққан.
Макдональд Лондон юқори судидаги апелляцияда ютқазиб қўйган, бироқ уни мустақил ўлдиришдан бош тортган. Жеронимонинг ҳимоясига ўн минглаб британияликлар чиққан, жумладан, мамлакат бош вазирининг отаси Стэнли Жонсон ҳам. Альпакани қутқариш бўйича петиция 140 мингдан ортиқ имзо тўплаган эди.
Изоҳ (0)