Британиялик собиқ ҳарбий Кобулдан 200 та ит ва мушукларисиз кетишни истамади. Улар Тошкент орқали эвакуация қилиниши мумкин

Пол Фартинг исмли собиқ британиялик ҳарбий фронтда итни қутқариб қолганидан сўнг, 2007 йили Кобулда ҳайвонлар учун бошпана қурган. Шундан буён Пол аскарларнинг қутқариб қолинган ҳайвонлар билан топишишига ёрдам берган, унинг маркази эса Афғонистондаги қутқарилган ҳайвонлар учун биринчи расмий бошпанага айланган, деб хабар беради Esquire.

Ҳокимият тепасига «Толибон» келгач, Пол 60 та мушуги ва 140 та ити билан мамлакатни тарк этмоқчи бўлган. Пол ва унинг 68 нафар ходими ҳарбий самолётда эвакуация қилиниши мумкин, аммо Фартинг ҳайвонларисиз Афғонистонни тарк этиш нияти эмас. Шу сабабли унга ҳайвонларни ташиш борасидаги халқаро қонунлар бўйича чартер рейс керак.

Фартинг ўз ходимлари ва ҳайвонлари билан аэропортда навбатсиз ўтказиб юборилишларини талаб қилмоқда. Аммо Британия хизматлари Фартинг ҳамда унинг ит ва мушукларини қолганлардан олдин олиб чиқиш ниятида эмас. Шунингдек, уларнинг маълум қилишича, Фартинг бошқа фуқароларнинг эвакуация қилинишига халақит бермоқда. «Ҳайвонлардан кўра, одамларни устун қўяётганим учун мени ёмон кўришингиз мумкин, бироқ бу менинг фикрим, шунингдек, ҳақиқатда хавф остида қолаётган жуда-жуда аламзада инсонлар бор», — дейди Британия мудофаа вазири Бен Уоллес.

Унинг фикрича, Кобулдан эвакуацияни амалга ошириш — бугунги кундаги энг хавфли ва мураккаб иш.

Пол, унинг ходимлари ва ҳайвонлар бир неча соат аэропорт ташқарисида туриб, Америка махсус хизматлари уларнинг киришига рухсат беришини кутган. Текширув жараёнларининг қийин тарафи шундаки, ҳайвонлар бошпанасининг ходимларини аксарияти афғонлар — улар анча қаттиқ текширилмоқда. Бундан ташқари, Уоллес Фартингни аэропортга киргизишмагунча самолёт ёки чартер рейс қидириш билан шуғулланмаслигини айтган.

Аэропортдаги портлашдан сўнг, америкаликлар унга кириш қоидаларини ўзгартирган ва Фартинг ҳамда унинг жамоасидан аэропорт ҳудудини тарк этиш сўралган. Шундай қилиб, у навбатдаги ўрнидан ажралган. Бунда Пол АҚШ президенти Жо Байденни айбламоқда.

Полнинг дўсти Доминик Деер Good Morning Britain шоусида ҳайвонлар, Фартинг ва унинг жамоаси учун Тошкент орқали махсус рейс ташкиллаштирилган. Ҳозирда Фартинг ходимлари билан вазият ўзгаришини кутмоқда.