Тошкент вилоятида депутат ва ИИБ ходимлари ўртасида жанжал акс этган видео бўйича расмий маълумот берилди

Тошкент вилоятининг Ўрта Чирчиқ тумани «Амфитеатр» мажмуасида 28 август куни Ўзбекистон мустақиллигининг 30 йиллигига бағишланган байрам тадбирларини ўтказиш жараёнида туман ички ишлар органлари ходимлари ҳамда Ўрта Чирчиқ тумани Халқ депутатлари кенгаши депутати Феруза Бабашева ва Чирчиқ шаҳар халқ депутатлари кенгаши депутати Жаҳонгир Тўлаганов ўртасида зиддиятли ҳолат вужудга келди. Ҳолат акс этган видео ижтимоий тармоқларда тарқалди.

Вилоят ИИББ матбуот хизматининг ёзишича, тадбирда жамоат тартибини сақлаш ва хавфсизликни таъминлаш, байрам тадбирига келган шахсларни карантин қоидаларига амал қилган ҳолда тиббий ниқобда киришларини назорат қилиш бўйича Ўрта Чирчиқ тумани ИИБ ходимлари хизматга жалб этилган.

Хизматдаги ходимлар томонидан байрам тадбирига келган Феруза Бабашева ва Жаҳонгир Тўлаганов тиббий ниқобсиз бўлганлиги сабабли кириш йўлагида тўхтатилган ва карантин қоидаларига риоя қилган ҳолда ҳимоя ниқобини тақиб киришлари ҳақида айтилган.

Шунда улар ўзларини депутат деб оғзаки равишда таништирган ва карантин қоидаларига амал қилишдан бош тортиб, ходимларнинг қонуний талабларини бажармаган.

«Жараёнда Феруза Бабашева ўзининг депутат эканлигини ва дахлсизлик ҳуқуқи борлигини пеш қилиб, хизмат вазифасини бажараётган ИИБ ходимларини ‘шармандалар’ деб камситган ва ушбу жараёнини тўғридан-тўғри 7 дақиқа 53 сония давомида видеотасвирга олиб, онлайн тарзда Facebook ижтимоий тармоғига узатган», — дея қайд этилган ИИББ хабарида.

ИИВ ахборот хизмати раҳбари Шоҳрух Ғиёсовнинг маълум қилишича, Тошкент вилояти Ички ишлар бош бошқармаси томонидан вазият тўлиқ ўрганилган ҳамда воқеа иштирокчиларининг ҳаракатларига ҳуқуқий баҳо бериш мақсадида тўпланган материаллар прокуратура органларига юборилган.

Депутат Феруза Бабашеванинг сўзларига кўра, Жаҳонгир Тўлаганов билан туман маъмурий марказига келганида дарвоза олдида 50 нафардан ортиқ болалар ва 6—7 нафар ёш болали аёллар турган бўлган, ИИБ ходимлари уларни байрамга киритмаётган бўлган. Депутатларнинг киришига эса ҳеч қандай қаршилик қилишмаган, тиббий ниқоб тақиш ҳам сўралмаган.

Дарвоза олдида турган болалар ва болали аёллар нега киритилмаётгани сўралганида «одам кўп, саҳна синиб кетиши мумкин», деган важ кўрсатилган. Феруза Бабашева уларни ўзи тартибга солиб туришини айтиб, киритган. Бир болали аёлни эса ИИБ ходимлари ушлаб олиб қайтарган. Буни кўрган депутат Жаҳонгир Тўлаганов уларнинг қилаётган иши нотўғрилигини айтган.

«Ўша аёл ҳам бировнинг келини, қизи. Қўлида бола турган аёлнинг қўлидан ушлаб, куч ишлатиб тортиб ташлаяпти. Ундай қилманг, аёлни қўйиб юборинг, деб айтдим. Шундан сўнг ИИБ ходими мен билан тортишиб кетди», — деган Жаҳонгир Тўлаганов ва аслида ниқоб бу баҳона эканлигини, ниқоб тақмаган фуқарони маҳкамага олиб бориш шарт эмаслиги, жойида баённома тузилиб, маъмурий жавобгарликка тортилишини таъкидлаб ўтган.

«Шу пайт ИИБ ходимларининг ўша ерда турган катталаридан бири Жаҳонгирни машинага тиқларинг, бўлимда гаплашамиз бу билан, деган буйруқни берди. ИИБ ходимлари эса буйруқни сўзсиз бажариб, Жаҳонгирни судрай бошлашди. Табиийки, мен туманимизга келган меҳмон депутатнинг ёнини олдим ва ноқонуний хатти-ҳаракатлари, депутатлик мақоми тўғрисида тушунтира бошладим», — деган Феруза Бабашева ва шу сабабли Facebook орқали тўғридан-тўғри эфир қилиб, видео олишга мажбур бўлганини билдирган.

Маълумот учун, «Халқ депутатлари вилоят, туман ва шаҳар кенгаши депутатининг мақоми тўғрисида»ги қонунга кўра, депутат ўзининг ваколатлари муддати мобайнида дахлсизлик ҳуқуқига эга. Тегишли Халқ депутатлари кенгашининг розилигисиз депутат мазкур ҳудудда жиноий жавобгарликка тортилиши, ушлаб турилиши, қамоққа олиниши ёки суд тартибида бериладиган маъмурий жазога тортилиши мумкин эмас.