Тошкентнинг Чилонзор туманидаги дўконларнинг бирида эркак аёлнинг сумкасидан ҳамённи ўғирлагани акс этган видео тарқалганди. Пойтахт ИИББ ушбу шахс қўлга олинганини маълум қилди.
Қайд этилишича, ҳолат 19 август куни Чилонзор тумани 18-кварталида жойлашган дўконлардан бирида юз берган. Аёлнинг сумкаси ичида 500 минг сўм пул ва Uzcard ҳамда Visa пластик карталари бўлган 160 минг сўмлик ҳамён ўғирланган. Ҳолат кузатув камерасига туширилган.
Тез орада гумонланувчи 38 ёшли Ф.А. эканлиги аниқланган ва у 21 август куни қўлга олинган.
Чилонзор тумани ИИО ФМБ ходимлари томонидан унга нисбатан Жиноят кодексининг 169-моддаси 2-қисми «а» банди (жабрланувчининг кийими, сумкаси ёки бошқа қўл юкидаги ашёга нисбатан киссавурлик) бўйича айблов тақдим этилиб, дастлабки тергов давомида тўпланган ҳужжатлар Чилонзор тумани жиноят ишлари бўйича судга йўналтирилди.
Бундан аввал Тошкентда «киноларда кўрганидек» дўконга ўғриликка тушиб, 1,4 миллион сўм ва тамаки ўғирлаган шахслар ушлангани ҳақида хабар берилган эди. Шунингдек, Яшнободдаги дўконда сотувчига пичоқ тираб, кассадаги пулларни ўмариб кетган тўрт шахсдан иккитаси қўлга олингани маълум қилинганди.
Изоҳ (0)