Маҳаллий авиақатновларни амалга оширувчи «Тошкент-3» аэропорти 19 августдан бошлаб вақтича ёпилганди. Uzbekistan Airways ушбу аэропорт ўз фаолиятини тиклашини маълум қилди.
Қайд этилишича, 31 августдан бошлаб «Тошкент-3» аэропорти ўз фаолиятини бошлайди ва республика бўйлаб амалга оширилувчи барча авиапарвозлар ушбу аэропортдан жадвалга кўра амалга оширилади.
«Йўловчилардан маҳаллий авиақатновлар билан боғлиқ саволларни авиакомпания алоқа-марказидан, аэропорт маълумот олиш марказидан ва Uzbekistan Airways ижтимоий тармоқларидан аниқлаштиришларини сўраймиз», — дейилади Uzbekistan Airways хабарида.
Эслатиб ўтамиз, «Тошкент-3» аэропорти Германия, Афғонистон ва Европа Иттифоқи давлатлари фуқароларини Тошкент аэропорти орқали транзит қилиб эвакуация қилиш мақсадида ёпилганди. Унгача республика бўйлаб амалга оширилувчи барча авиапарвозлар Ислом Каримов номидаги Тошкент халқаро аэропортидан амалга оширилди.
Изоҳ (0)