Тошкент вилоятининг пойтахтга туташ қисмида, Қибрай туманида барпо этилган «Янги Ўзбекистон» боғида Мустақилликнинг 30 йиллиги муносабати билан байрам тадбирлари ташкил этилиши сабабли ушбу боғга олиб борувчи йўлда транспорт ҳаракати чекланади.
ЙҲХББ матбуот хизмати хабарига кўра, 31 август ҳамда 1—2 сентябрь кунлари мазкур боғ атрофида, Темур Малик ҳамда Оҳангарон шоҳкўчалари кесишмасидан бошлаб Махтумқули—Истиқлол автомобиль йўли бўйлаб 4Р-12 Бектемир—Чорбоғ автомобиль йўлигача бўлган масофада транспорт воситалари ҳаракати чекланади.
Тирбандликларнинг олдини олиш мақсадида ҳайдовчиларга бошқа айланма йўллардан фойдаланиш тавсия этилган.
Эслатиб ўтамиз, мамлакат мустақиллигининг 30 йиллигига бағишланган асосий байрам тадбири Президент Шавкат Мирзиёев «Янги Ўзбекистон» газетасининг 17 август кунги сонига берган интервьюсида маълум қилганди. «Пойтахтимизга туташ 100 гектардан ортиқ улкан ҳудудда ‘Янги Ўзбекистон’ боғи ҳамда бетакрор Мустақиллик мажмуаси жадал суръатлар билан бунёд этилмоқда. Насиб этса, бу йил энг улуғ, энг азиз байрамимизни мана шу янги майдонда ўтказамиз», — деган эди Президент.
Изоҳ (0)