Kia компанияси 1 сентябрь куни Sportage’нинг Европа бозорлари учун мўлжалланган калта ғилдирак базасига эга янги авлодини тақдим этади. Афтидан, ушбу версия Осиё бозори учун мўлжалланган Sportage’дан қуйруқ қисми билан ажралиб туради, деб хабар беради Motor.
Орқа том қисми устунларининг ўзгача кўриниши ва бешинчи эшик ойнасининг кичрайгани моделга спорт автомобили кўринишини тақдим этган. Ўлчамлари жиҳатидан эса у олдинги авлод Sportage’дан фарқ қилмайди — узунлиги тахминан 4,48 метрни ташкил этади. Тахминларга кўра, кроссовер опция сифатида қора том қисм ва матрицали фараларга эга бўлади.
Янги Sportage Hyundai Tucson ишлаб чиқарилган платформада йиғилган. Двигательлар гаммасидан 1,6 литрли бензин ва дизелли «турботўртлик», шунингдек, 48 волтли стартёр-генератор ўрин олиши кутилмоқда — бу каби версиялар Осиё бозорига тақдим этилган кроссоверда мавжуд.
Инсайдерлар тармоқдан қувват оладиган гибрид модификацияни ҳам эслаб ўтган. Унинг куч узатмаси таркибидан 1,6 литрли турбодвигатель ва биргаликда 226 от кучи тақдим этишга қодир электромотор ўрин олади. Бу каби Sportage сиғими 13,8 киловатт/соатли батареяга эга бўлиб, фақатгина электр энергиясининг ўзида у 45 километргача масофани босиб ўта олади.
Янги авлод Sportage’нинг тақдимоти куз бошига режалаштирилган, Европа дилерларига эса 2021 йил охирига қадар етказиб берилади.
Аввалроқ бешинчи авлод Kia Sportage модели Жанубий Корея бозорида ажиотажни келтириб чиқаргани тўғрисида хабар берилганди. Компаниянинг маълум қилишича, биринчи сутканинг ўзидаёқ модель учун 16 078 та олдиндан буюртма келиб тушган ва бу ихчам кроссоверлар сегментидаги янги рекорд ҳисобланади.
Изоҳ (0)