Жанубий Кореяда Tesla Model 3 электрокари янги автомобилларни баҳолашнинг KNCAP усули бўйича хавфизликка текширилди. Электрокар краш-тест вақтида вазифани аълога уддалаб, бешта юлдузни қўлга киритган, аммо ёрдамчи тизимлар синовида вазият ўзгарган: йўлда тўсатдан пайдо бўлган тўсиқ вақтида фавқулодда тормозланиш тизими бир неча бор ишламай қолган ва Model 3 велосипедчи вазифасини бажарган манекенни уриб юборган. Натижада моделга қўйилган баҳо тўрт юлдузга тушиб кетган, деб хабар беради Motor.
Краш-тестлар серияси якунига кўра, Tesla Model 3 максимал беш юлдузга мос келадиган 83,3 баллни қўлга киритган. Шу билан бирга, велосипед ҳайдовчилар ва пиёдалар хавфсизлиги уч юлдузга баҳоланган бўлиб, бу паст натижа ҳисобланади.
Бунга электрокар соатига 20, 25 ва 40 километр тезликда ўтказилган синовларда бир неча бор велосипедчини уриб юборгани сабаб бўлган. Бу каби вазият йўлда содир бўлганида катта эҳтимол билан жиддий жароҳат олинмаган бўларди, бироқ тизим йўлдаги объектни нима сабабдан танимагани ва фавқулодда тормозланишни ишга туширмагани номаълум.
Бу Tesla Model 3 билан ўтказилган биринчи краш-тест эмас. Масалан, 2019 йилда электрокар Америка Йўллардаги хавфсизлик суғуртаси институти (IIHS) услуби бўйича синовлардан ўтказилган: модель барча тест якунлари бўйича энг юқори балларни тўплаб, Top Safety Pick+ рейтинги етакчисига айланган тарихдаги иккинчи электромобилга (Audi e-tron’дан кейинги) айланган.
Аввалроқ хитойликлар Tesla электрокарларининг тепкиларини видеога олиш учун камера ўрнатишни бошлагани, бунга сўнгги вақтда ЙТҲлар ортгани сабаб бўлаётгани тўғрисида хабар берилганди.
Изоҳ (0)