Kia kompaniyasi 1-sentabr kuni Sportage’ning Yevropa bozorlari uchun mo‘ljallangan kalta g‘ildirak bazasiga ega yangi avlodini taqdim etadi. Aftidan, ushbu versiya Osiyo bozori uchun mo‘ljallangan Sportage’dan quyruq qismi bilan ajralib turadi, deb xabar beradi Motor.
Orqa tom qismi ustunlarining o‘zgacha ko‘rinishi va beshinchi eshik oynasining kichraygani modelga sport avtomobili ko‘rinishini taqdim etgan. O‘lchamlari jihatidan esa u oldingi avlod Sportage’dan farq qilmaydi — uzunligi taxminan 4,48 metrni tashkil etadi. Taxminlarga ko‘ra, krossover opsiya sifatida qora tom qism va matritsali faralarga ega bo‘ladi.
Yangi Sportage Hyundai Tucson ishlab chiqarilgan platformada yig‘ilgan. Dvigatellar gammasidan 1,6 litrli benzin va dizelli “turboto‘rtlik”, shuningdek, 48 voltli startyor-generator o‘rin olishi kutilmoqda — bu kabi versiyalar Osiyo bozoriga taqdim etilgan krossoverda mavjud.
Insayderlar tarmoqdan quvvat oladigan gibrid modifikatsiyani ham eslab o‘tgan. Uning kuch uzatmasi tarkibidan 1,6 litrli turbodvigatel va birgalikda 226 ot kuchi taqdim etishga qodir elektromotor o‘rin oladi. Bu kabi Sportage sig‘imi 13,8 kilovatt/soatli batareyaga ega bo‘lib, faqatgina elektr energiyasining o‘zida u 45 kilometrgacha masofani bosib o‘ta oladi.
Yangi avlod Sportage’ning taqdimoti kuz boshiga rejalashtirilgan, Yevropa dilerlariga esa 2021-yil oxiriga qadar yetkazib beriladi.
Avvalroq beshinchi avlod Kia Sportage modeli Janubiy Koreya bozorida ajiotajni keltirib chiqargani to‘g‘risida xabar berilgandi. Kompaniyaning ma’lum qilishicha, birinchi sutkaning o‘zidayoq model uchun 16 078 ta oldindan buyurtma kelib tushgan va bu ixcham krossoverlar segmentidagi yangi rekord hisoblanadi.
Izoh (0)