Chevrolet ўзининг ўрта моторли Corvette суперкарининг гибрид версиясини тақдим этишга тайёр: автомобиль биргаликда 650 от кучини тақдим этишга қодир электромотор ва 6,2 литрли бензин моторига эга бўлади. Электромотор фақатгина олд ўқни айлантиришини ҳисобга олсак, гибрид Corvette соф электр режимда ҳаракатлана олади — соатига 50 километрдан ошмаган ҳолда. Машина сотувга 2023 йилда тахминан 100 минг доллар қийматида сотувга чиқади, деб хабар беради Motor.
Muscle Cars & Trucks нашрининг маълумотларига кўра, гибрид суперкар кутилганидан ҳам кучли бўлиб чиққан. Corvette’нинг янги версияси аввалроқ 600 от кучини ваъда қилганди, аммо эндиликда инсайдерларнинг таъкидлашича, гибрид моторнинг қуввати 650 от кучига кўтарилган. Бу каби энергияқувват ёрдамида Corvette соатига 100 километр тезликка 2,5 сониядан камроқ вақт ичида эришади. Автомобиль тахминан 500 от кучини тақдим этишга қодир LT2 оиласига кирувчи 6,2 литрли V8 моторини сақлаб қолган. У машинанинг орқа ғилдиракларини айлантиради, аммо олд ўқда қўшимча сифатида электромотор пайдо бўлиб, яна 150 от кучи билан таъминлайди.
Corvette’нинг гибрид моторли версияси пайдо бўлиши ҳақида анчадан буён гап-сўзлар мавжуд. Миш-мишларга кўра, электрлаштирилган Corvette C8 нинг бирданига бир нечта версияси тақдим этилади.
Аввалроқ АҚШ президенти Жо Байден General Motors концерни раҳбари Мери Барра уни Chevrolet Corvette суперкарининг электр энергиясида ҳаракатланувчи версияси рулига ўтқазишни ваъда қилганини сўзлаб берганди.
Изоҳ (0)