Афғонистондаги ҳарбий-сиёсий вазият беқарорлиги туфайли Қирғизистон ушбу мамлакат фуқароларига виза беришни чеклади. Бу ҳақда 24.kg нашри Қирғизистон Ташқи ишлар вазирлигига таяниб хабар берди.
Хабарга кўра, Қирғизистон ҳудудига номақбул шахсларнинг ва қочқинларнинг оммавий кириб келишига йўл қўймаслик чоралари кўрилган.
Чекловлар дипломатик ва хизмат визаларини беришга тааллуқли эмас. «Афғонистонлик талабалар учун Қирғизистонга виза бериш масаласи тасдиқланиш босқичида», — дейилади ТИВ хабарида.
Аввалроқ Қирғизистон Миллий хавфсизлик давлат қўмитаси республика илгари маҳаллий таълим муассасаларида ўқиган афғонистонлик фуқароларга виза беришни давом эттиришга, шунингдек, мамлакат олий ўқув юртларида ўқишни истаган 500 нафаргача талабани қабул қилишга тайёрлигини билдирганди.
Қирғизистон ТИВ раҳбари Руслан Казакбаевнинг маълум қилишича, АҚШ Афғонистондаги Америка қўшинларини Қирғизистонга жойлаштириш масаласи бўйича Бишкекка мурожаат қилган, аммо ҳозирча бундай форматда ҳамкорлик қилиш ҳақида гап йўқ.
Вазирнинг сўзларига кўра, Қирғизистон Вашингтон билан террорчиликка қарши курашда жуда катта тажрибага эга. Унинг эслатишича, мамлакат халқаро коалиция кучларини транзит ўтказиш марказида, «Манас» аэропортининг авиабазасида қабул қилган.
«Албатта, турли хил мурожаатлар, турли даражадаги маслаҳатлашувлар бўлган. Лекин Афғонистондаги вазият ҳар куни ўзгариб бормоқда ва ҳозирча бундай форматда ҳамкорлик масаласи кўтарилмаган», — деди Қирғизистон ТИВ раҳбари АҚШ Бишкекка Америка қўшинларини Афғонистондан республикага ўтказишни таклиф қилганми, деган саволга жавоб берар экан.
Май ойида Wall Street Journal манбаларга таяниб, АҚШ Афғонистондан олиб чиқаётган қўшинларини Марказий Осиёга жойлаштириши мумкинлиги ҳақида хабар тарқатган, бироқ ҳозирча ҳеч қандай келишув йўқ. Нашрнинг қайд этишича, АҚШга нафақат ҳарбий хизматчиларни, балки учувчисиз учар қурилмаларни, бомбардимончи ва артиллерияни жойлаштирадиган базалар керак. Айрим ҳарбий амалдорлар ва АҚШ президенти Жо Байден маъмурияти вакилларига кўра, қўшинларни Афғонистон билан чегарадош Ўзбекистон ва Тожикистонга жойлаштирган маъқулроқ.
Июль ойида Bloomberg АҚШ президенти Жо Байден маъмурияти Қозоғистон, Тожикистон ва Ўзбекистондан ўз ҳудудларига АҚШ Қуролли кучлари билан ишлаган 9 мингга яқин афғонларни вақтинча жойлаштиришни сўрагани ҳақида хабар берган эди. Айни пайтда Қозоғистон АҚШдан афғонистонлик қочқинларни қабул қилиш бўйича мурожаат келиб тушмаганини билдирди.
Изоҳ (0)