Россия президенти Владимир Путин Грозний халқаро аэропортига Чеченистон биринчи президенти Аҳмад Қодиров номини берди. Тегишли фармон ҳуқуқий ахборот расмий порталида эълон қилинган, деб ёзади Meduza.
«Грозний (Шимолий) халқаро аэропортига А.А.Қодировнинг номи берилсин», — дейилади фармонда.
Хабарга кўра, фармон Аҳмад Қодиров таваллудининг 70 йиллиги муносабати билан имзоланган. 2021 йилнинг баҳорида Чеченистонда Грозний аэропортига кимнинг номини бериш кераклиги овозга қўйилган. Овоз бериш Чеченистон жамоатчилик палатаси томонидан ташкил қилинган. Маълум бўлишича, қарийб 90 фоиз иштирокчилар Аҳмад Қодиров номига овоз берган.
Аҳмад-Ҳожи Қодиров — Чеченистоннинг амалдаги президенти Рамзан Қодировнинг отаси. У 2000 йилдан Чеченистон муваққат маъмуриятининг раҳбари, 2003 йилдан республика президенти бўлиб ишлаган. Аҳмад Қодиров 2004 йил 9 майда Грознийдаги «Динамо» стадионида содир бўлган портлашда ҳалок бўлган. Вафотидан кейин унга «Россия Қаҳрамони» унвони берилди.
Чеченистоннинг кўплаб шаҳарларида 300 дан ортиқ кўчалар, мактаблар ва болалар боғчалари Аҳмад Қодиров номи билан аталади. Биринчи президент шарафига унинг аждодлари яшаган қишлоқ номи ўзгартирилган. Грознийда бош майдон, хиёбон, масжид, истироҳат боғи ва бошқа объектларга Аҳмат Қодиров номи берилган. Шунингдек, унинг исми Россия гвардиясининг чечен полки ва илгари «Терек» деб аталган «Аҳмад» футбол клубига берилган.
Изоҳ (0)