Буюк Британия қироличаси Елизавета II Букингем саройи амалдорларига шаҳзода Гарри ва унинг рафиқаси Меган Марклнинг танқидлари юзасидан туҳмат ишлари бўйича мутахассислар билан маслаҳатлашишни буюрди. Бу ҳақда The Sun манбасига таяниб хабар берди.
Нашр суҳбатдошининг сўзларига кўра, 95 ёшли қиролича «доимий ҳужумлардан безовталанади». «Ҳамма нарсанинг чегараси бор. Қиролича ва унинг оиласи адвокатларни ёллади. Гарри ва Меган такрорий ҳужумлар қабул қилиниши мумкин эмаслигини билиб ва тушуниб олади», — деди манба. У адвокатлар Сассекс герцоги ва герцогинясининг баёнотларига «қонуний жавоб» тайёрлаётганини таъкидлади.
The Sun ёзишича, хусусан, адвокатлар 2022 йил охирида шаҳзода Гаррининг хотираларини нашр этишга тайёрланаётган Penguin Random House нашриётига огоҳлантириш юборишни ўйламоқда.
«Мен ҳаётим давомида ўрганганларимни бўлишиш имкониятидан жуда миннатдорман ва одамлар менинг мутлақо ҳақиқатга асосланган ҳикоямни биринчилардан бўлиб ўқишидан жуда ҳаяжондаман», — деган эди китоб муаллифи аввалроқ.
«Агар китобда кимдир тилга олинса ва бирор нимада тўғридан-тўғри айбланса, бу туҳмат ва шахсий оилавий ҳаётга нисбатан ҳуқуқларнинг бузилиши деб баҳоланиши мумкин», — деди The Sun манбаси. У адвокатлар китоб мазмуни билан танишиш ва изоҳ бериш имкониятига эга бўлиш учун нашриёт билан боғланишини истисно қилмади.
Букингем саройи бу ҳақда изоҳ беришдан бош тортди.
Март ойида Британия шаҳзодаси Гарри ва унинг рафиқаси Меган Маркл америкалик машҳур телебошловчи Опра Уинфрига интервью берганди. Интервьюда бошқа масалалар қаторида, Меган қироллик оиласининг баъзи аъзолари жуфтликнинг биринчи фазанди Арчининг танаси қорамағиз бўлишидан хавотирлангани ҳақида айтган. Шаҳзода Гарри ва Меган Марклнинг интервьюси шов-шувга айланди. Бутун дунё Британия монархияси бу зарбага қандай дош беришини муҳокама қилди.
31 августда британиялик журналистлар Омида Скоби ва Кэролин Дюранд муаллифлигидаги Сассекс герцоги ва герцогинясининг турмуши ҳақида ёзилган Finding Freedom («Эркинликни топиш») китобини қайта нашр этиш режалаштирилган (китобнинг биринчи версияси 2020 йил августда нашр этилган). Янгиланган версияга қўшилган эпилогда муаллифлар шаҳзода Гарри ва Меган Маркл Уинфри билан бўлган интервьюда айтилган гапларга, хусусан, ирқчилик ҳақидаги баёнотга қироллик оиласи билдирган муносабатдан ҳафсаласи пир бўлганини таъкидлайди, деб ёзади The Times. «Орадан вақт ўтиб, энди ҳеч ким жавобгарликни ўз зиммасига олишга тайёр эмас. Буни ҳисобга олиб, қандай қилиб давом этиш мумкин?» — деди Сассекс герцогинясининг дўстларидан бири нашрга. Аввалроқ эр-хотиннинг матбуот котиби шаҳзода Гарри ва Меган Марклнинг китобга ҳеч қандай алоқаси йўқлигини айтган.
Изоҳ (0)