Ижтимоий тармоқларда Қашқадарёдаги қамоқхонада 19 ёшли йигит ўз жонига қасд қилгани ҳолати юзасидан Қарши махсус прокурори ходимларга нисбатан иш қўзғатгани ва тергов ҳаракатлари бошлангани ҳақида хабарлар тарқалди. Бош прокуратура ҳолат юзасидан расмий маълумот берди.
Аниқланишича, Қарши шаҳридаги манзил-колониясида жазо ўтаётган маҳкум Д.Ж. муассасада жойлашган озиқ-овқат дўконидан чиқиб, чўнтагида бўлган соқол олиш учун мўлжалланган олмос бўлаги (лезвие) билан қорнини ва қўлларини 3-4 маротаба тилган.
Ҳолат юзасидан тайинланган суд-тиббий экспертиза хулосасига кўра, маҳкумда енгил тан жароҳатлари аниқланган. Қарши махсус прокуратураси томонидан терговга қадар текширув ҳаракатлари ўтказилмоқда.
Қарши махсус прокурори колония ходимларига нисбатан иш қўзғатгани ва тергов ҳаракатлари бошлангани ҳақидаги маълумот эса ҳақиқатга зид экани билдирилган.
Апрель ойларида Қашқадарёдаги қамоқхонада 30 ёшли маҳкум ўзини осиб қўйгани, унинг қариндошлари маҳкум ўз жонига қасд қилганига шубҳаланаётгани ҳақида хабар берилган эди. Сенатнинг Суд-ҳуқуқ масалалари ва коррупцияга қарши курашиш қўмитаси ИИВдан мазкур ҳолатни назоратга олиш ва пухта ўрганиб чиқиш ҳамда натижаси юзасидан расмий баёнот беришни сўраганди.
Изоҳ (0)