Ички ишлар вазири Пўлат Бобожонов Қашқадарё вилояти ИИБ ахборот хизмати раҳбари Ирода Расуловага танбеҳ берган. Ахборот хизмати раҳбарининг ишда қолиш-қолмаслиги ҳам сўроқ остида қолмоқда. Бу ҳақда вазирлик ахборот хизмати раҳбари Шоҳрух Ғиёсовга таяниб, «Дарё» мухбири хабар берди.
Қайд этилишича, вазир Пўлат Бобожоновнинг бундай қарорга келишига чемпион йигит ўлими юзасидан Қарши шаҳрида бўлиб ўтган матбуот анжуманида журналистларнинг Ирода Расуловага нисбатан қилган эътирози сабаб бўлган.
«Дарё» мухбирининг маълумот беришича, Қашқадарё вилояти прокуратурасида бош прокурор Ниғматилла Йўлдошев, ички ишлар вазири Пўлат Бобожонов ҳамда Олий суд раиси Козим Комилов иштирокидаги матбуот анжуманида журналист Ўрал Камолов сўз олиб, вилоят ИИБ ахборот хизмати раҳбари Ирода Расулова ўз ишини уддалай олмаётганини, ОАВ вакиллари томонидан берилган саволлар очиқ қолаётганини айтиб, вазирлик томонидан матбуот котибининг хатти-ҳаракатига қандай изоҳ берилиши билан қизиққан.
Мазкур саволга жавоб берган вазир Пўлат Бобожонов «Қашқадарё вилояти мисолида айтаётган бўлсангиз, кеча ҳам мен бу ҳақида маълумот олдим, яъни вилоят ИИБ матбуот котиби журналистнинг саволига жавоб бермагани ва вазиятни очиқ қолдиргани ҳақида хабар топдим. Лекин мен буни очиқ қолдирмайман, бу ҳақда топшириқ бераман ўрганиб чиқиб, қарор қабул қиламиз», — деганди.
«Дарё» мухбири Ички ишлар вазирлиги ахборот хизмати Шоҳрух Ғиёсов билан боғланиб, вазир Пўлат Бобожоновнинг шу жавобидан сўнг нималар ўзгарганига қизиқди.
«Вазир ОАВ вакилларининг эътирозларини инобатга олиб, Ирода Расуловага жамоатчилик билан алоқаларни сусайтириб юборганлиги, бу ҳолатга йўл қўйиб бўлмаслиги, ва умуман, жамоатчилик билан алоқаларни мустаҳкамлаш ва тезкорликни ошириш зарурлигини таъкидлаб, масъулга қаттиқ танбеҳ эълон қилди. Камчиликларни бартараф этиш учун қисқа муддат бериб, унинг фаолияти тўққиз ой якуни бўйича танқидий баҳоланишини ва натижаси бўйича лавозимида қолиш-қолмаслик масаласи ҳам кўриб чиқилишини билдирди», — дейди Шоҳрух Ғиёсов «Дарё» мухбири саволига жавоб берар экан.
Шоҳрух Ғиёсовнинг маълумот беришича, ички ишлар вазири ҳар уч ойда ҳудудий бошқармаларнинг ахборот хизмати раҳбарлари фаолиятини шахсан ўрганиб, хулоса қилади.
«Ҳар бир вилоят ахборот хизматлари учун рейтинг тизими ишлаб чиқилган. Таҳлилий бўлим камчиликларни кўрсатиб, шарҳ тайёрлайди ва бу ҳақда вазирга ахборот берилади. Натижаси бўйича кимдир рағбатлантирилади, кимгадир камчиликларни бартараф этиш бўйича муддат берилади ёки интизомий жазо берилади», — дейди Шоҳрух Ғиёсов.
Эслатиб ўтамиз, Қашқадарё вилояти ИИБ ахборот хизмати раҳбари Ирода Расулова чемпион йигит ўлими билан боғлиқ суриштирув олиб борган «Дарё» мухбирининг «воқеа гувоҳлари 102 га хабар берилганидан сўнг ҳам, ИИБ ходимлари воқеа жойига 40-45 дақиқада етиб келганини айтишмоқда, аслида, ИИБ ходимлари чақирувдан сўнг қанча вақтда воқеа жойида бўлишган?», деган саволига «вазиятни аниқлаштириб, сизга аниқ маълумот тақдим этаман» дейишига қарамасдан, саволни очиқ қолдирган. Мазкур вазиятни кузатганини айтган вазир Пўлат Бобожонов эса «Дарё»да кўтарилган саволга шахсан ўзи жавоб бериб, 102 га қилинган қўнғироқдан сўнг ИИБ ходимлари воқеа жойига 21 дақиқада борганини билдирганди.
Изоҳ (0)