Бирлашган Миллатлар Ташкилоти бош котиби Антониу Гутерриш «Толибон» вакиллари билан шахсан гаплашишга тайёр. Бу ҳақда Гутерриш матбуот анжуманида айтиб ўтди.
«Мен («Толибон» билан) шахсан гаплашишга тайёрман. Айнан ким билан қайси масалада гаплашишим мумкинлиги аниқ бўлса бас. Бир кун олдин Қатар бош вазири ўринбосари ва ташқи ишлар вазири билан яқин мулоқотда бўлдим. Биз Қатарнинг ташаббусини кузатамиз ва қўллаб-қувватлаймиз. Умид қиламанки, Афғонистонда бирор-бир инклюзив ҳукумат тузиш мумкин бўлади», — деди Гутерриш.
БМТнинг Афғонистондаги гуманитар масалалар бўйича координатори Рамиз Алакбаровнинг маълум қилишича, «Толибон» БМТдан мамлакатда қолишни ва инсонпарварлик фаолиятини давом эттиришни сўраган. Алакбаровнинг таъкидлашича, ташкилот «Толибон» билан аниқ келишувга эга эмас.
Унинг сўзларига кўра, БМТ гуманитар идораси ва «Толибон» ўртасидаги амалий ўзаро муносабатлар 18 йилдан бери давом этмоқда. «Бизда ишчи алоқалар мавжуд. Улар бизни қўллаб-қувватлашига ҳар доим ишонтириб келади. Улар буни яна бир бор билдирди ҳамда биздан бу ерда қолишимизни ва гуманитар ёрдам кўрсатишда давом этишимизни сўради», — дейди БМТ вакили.
Унинг қўшимча қилишича, БМТнинг жангарилар билан ўзаро муносабатларига «табиийки, баъзи аниқликлар киритилади, тафсилотлар ишлаб чиқилади». Хусусан, ташкилот гуманитар шароитда ишлайдиган аёлларнинг иш жойида қолиши масаласини ишлаб чиқмоқчи, деди Рамиз Алакбаров.
Халқаро валюта жамғармаси (ХВЖ) Афғонистонга ёрдам беришни тўхтатган эди. Бунга республикани эгаллаб олган «Толибон» ҳокимиятининг тан олиниш-олинмаслиги муаммоси сабаб бўлмоқда.
Шунингдек, АҚШ Афғонистоннинг Америка банкларидаги давлат захираларини музлатиб қўйган. ХВЖ маълумотларига кўра, 2021 йил апрель ойи ҳолатида Афғонистон ҳукумати захиралари 9,4 миллиард доллар бўлган, бу мамлакат йиллик ялпи ички маҳсулотининг учдан бир қисмини ташкил қилади. Бу маблағлар, асосан, АҚШда сақланади, Америка банкларидаги маблағларнинг аниқ миқдори номаълум, аммо Washington Post маълумотларига кўра, бу миллиардлаб долларни ташкил қилади.
Изоҳ (0)