Қозоғистон авиация маъмурияти фуқаролар хавфсизлигига таҳдид туфайли маҳаллий авиакомпанияларга тегишли самолётларнинг Афғонистон устидан учишини тақиқлади. Бу ҳақда Tengrinews хабар берди.
Хабарга кўра, Қозоғистон авиация маъмурияти маҳаллий авиакомпанияларнинг фуқаролик самолётлари Афғонистон ҳаво ҳудудидан фойдаланиши чоғида таҳдидлар ва хавф-хатарларни баҳолаган.
«Унинг натижаларига кўра, Афғонистон ҳудудига ва унинг устидан учиш пайтида йўловчилар ва самолётларнинг хавфсизлигига таъсир қиладиган хавф ва таҳдидлар бор деган қарорга келинди.
Баҳолаш натижаларига асосланган ҳолда, 16 август куни Қозоғистон Авиация маъмурияти мунтазам юк ва чартерли авиаташувларни амалга оширувчи Қозоғистон авиакомпанияларига ҳозирги вазият барқарорлашгунча фуқаролик самолётларининг Афғонистон ҳудудига ва унинг ҳаво ҳудуди устидан ўтувчи барча парвозларини тақиқлаш бўйича тегишли кўрсатмаларни юборди», — дейилади хабарда.
Шунга ўхшаш кўрсатма «Казаэронавигация» республика давлат корхонасига ҳам юборилган.
15 август куни «Толибон» Афғонистоннинг бутун ҳудудини ўз назорати остига олганини эълон қилди. Ҳозир Кобул аэропорти Афғонистонни тарк этиш мумкин бўлган ягона жой, аэропорт АҚШ ҳарбийлари назорати остида. Минглаб одамлар учиб кетишни хоҳлайди, 16 август куни эрталаб улар рейслардан бирортасига ўтириш учун учиш майдонига бостириб кирган ва ерда турган самолётларга осилиб чиқишга ҳаракат қилган. Ҳодиса оқибатида 7 киши ҳалок бўлган.
АҚШ ҳарбий-ҳаво кучларига тегишли C-17 Globemaster III ҳарбий транспорт самолёти Кобулдан 640 қочқинни битта рейсда эвакуация қилган. Дастлаб шунча одамни бортга олиб чиқиш режалаштирилмаган эди, бироқ афғон гуруҳлари самолётга ўзлари чиқиб олган.
Германия, Нидерландия ва Чехия самолётлари учиш-қўниш йўлагидаги оломон туфайли Кобул аэропортига қўна олмади.
Шунингдек, Афғонистондаги вазият туфайли авиакомпаниялар мамлакат ҳаво ҳудудини четлаб учишни бошлаган, хусусан Uzbekistan Airways ҳам Афғонистон ҳудудини айланиб ўтишни бошлади.
Изоҳ (0)