Qozog‘iston aviatsiya ma’muriyati fuqarolar xavfsizligiga tahdid tufayli mahalliy aviakompaniyalarga tegishli samolyotlarning Afg‘oniston ustidan uchishini taqiqladi. Bu haqda Tengrinews xabar berdi.
Xabarga ko‘ra, Qozog‘iston aviatsiya ma’muriyati mahalliy aviakompaniyalarning fuqarolik samolyotlari Afg‘oniston havo hududidan foydalanishi chog‘ida tahdidlar va xavf-xatarlarni baholagan.
“Uning natijalariga ko‘ra, Afg‘oniston hududiga va uning ustidan uchish paytida yo‘lovchilar va samolyotlarning xavfsizligiga ta’sir qiladigan xavf va tahdidlar bor degan qarorga kelindi.
Baholash natijalariga asoslangan holda, 16-avgust kuni Qozog‘iston Aviatsiya ma’muriyati muntazam yuk va charterli aviatashuvlarni amalga oshiruvchi Qozog‘iston aviakompaniyalariga hozirgi vaziyat barqarorlashguncha fuqarolik samolyotlarining Afg‘oniston hududiga va uning havo hududi ustidan o‘tuvchi barcha parvozlarini taqiqlash bo‘yicha tegishli ko‘rsatmalarni yubordi”, — deyiladi xabarda.
Shunga o‘xshash ko‘rsatma “Kazaeronavigatsiya” respublika davlat korxonasiga ham yuborilgan.
15-avgust kuni “Tolibon” Afg‘onistonning butun hududini o‘z nazorati ostiga olganini e’lon qildi. Hozir Kobul aeroporti Afg‘onistonni tark etish mumkin bo‘lgan yagona joy, aeroport AQSh harbiylari nazorati ostida. Minglab odamlar uchib ketishni xohlaydi, 16-avgust kuni ertalab ular reyslardan birortasiga o‘tirish uchun uchish maydoniga bostirib kirgan va yerda turgan samolyotlarga osilib chiqishga harakat qilgan. Hodisa oqibatida 7 kishi halok bo‘lgan.
AQSh harbiy-havo kuchlariga tegishli C-17 Globemaster III harbiy transport samolyoti Kobuldan 640 qochqinni bitta reysda evakuatsiya qilgan. Dastlab shuncha odamni bortga olib chiqish rejalashtirilmagan edi, biroq afg‘on guruhlari samolyotga o‘zlari chiqib olgan.
Germaniya, Niderlandiya va Chexiya samolyotlari uchish-qo‘nish yo‘lagidagi olomon tufayli Kobul aeroportiga qo‘na olmadi.
Shuningdek, Afg‘onistondagi vaziyat tufayli aviakompaniyalar mamlakat havo hududini chetlab uchishni boshlagan, xususan Uzbekistan Airways ham Afg‘oniston hududini aylanib o‘tishni boshladi.
Izoh (0)