Буюк Британиянинг Афғонистондаги элчиси Лори Бристоу «Толибон» ҳокимиятни қўлга киритгандан кейин мамлакатни тарк этиши керак эди, лекин у британияликларга ва Британия ҳукумати билан алоқаси бор афғонларга ёрдам бериш учун қолди. 15 август куни Бристоу Британия элчихонаси кўчириб келинган Кобул аэропортида афғонларга шахсан ўзи виза берди, деб ёзмоқда Daily Mail.
«Бизнинг элчимиз Кобулда қолади, Британия ҳукумати вакиллари Британия фуқароларига ва афғонистонлик ходимларимизга ёрдам беришда давом этмоқда», — деди Британия Ташқи ишлар вазирлиги нашрга.
Буюк Британия «Толибон» Кобулни эгаллашидан бир неча кун олдин ўз элчихонасини қисқартириб, Афғонистонга 600 аскар юбораётганини маълум қилганди. Ҳарбийлар Британия фуқароларини ва Ғарб билан ҳамкорлик қилган, эндиликда «Толибон» таҳдиди остида қолаётган Афғонистон фуқароларини эвакуация қилишни таъминлаши керак. Daily Mail нашрининг ёзишича, гап Британия паспортига эга 3 минг киши, оилалари билан ҳисоблаганда 3 минг афғонистонлик таржимонлар ва у ёки бу тарзда Британияга алоқадор яна 2 минг афғон ҳақида кетмоқда.
«Толибон» Кобул аэропортидаги эвакуация ишларига аралашмасликка ваъда берган. Аммо америкаликлар ва уларнинг иттифоқчилари билан ҳамкорлик қилган афғонистонликлар «Толибон» уларнинг кетишига тўсқинлик қилишидан қўрқмоқда. Британия аскарлари ва дипломатлари учун таржимонлик қилган афғонистонлик Telegraph’га берган интервьюсида айтишича, «вақт тугади», яқинда «Толибон» хорижий ҳукуматлар билан ишлаганларни таъқиб қилишни бошлайди.
The Telegraph хабарига кўра, Буюк Британия элчиси Лори Бристоу Афғонистонни Кобул қўлга олингандан кейинги кун — 16 август куни кечгача тарк этиши керак эди. Аммо манбанинг айтишича, Бристоу август ойининг охиригача давом этиши мумкин бўлган эвакуация жараёнини назорат қилиш учун Афғонистонда қолмоқда. Ижтимоий тармоқларда Бристоуни қаҳрамон деб аташмоқда.
57 ёшли Лори Бристоу — Кембриж университети битирувчиси, адабиёт фанлари доктори. У 1990 йилларнинг бошларида Британия Ташқи ишлар вазирлигида иш бошлаган ва Руминия, Туркия, Озарбайжонда фаолият олиб борган. 2016—2020 йилларда Бристоу Буюк Британиянинг Россиядаги элчиси бўлган. Бу даврда икки мамлакат ўртасидаги муносабатлар, асосан, Скрипалларнинг заҳарланиши билан боғлиқ ҳолда кескинлашган эди.
Заҳарланиш воқеасидан бир йил ўтиб, 2019 йил март ойида Бристоу ўз интервьюсида «Россия давлати ўз атрофидагиларни хавф остига қўймоқда», деб айтган ва Москвани «беқарорлик, эҳтиётсизлик» қилмасликка чақирган. Россия Ташқи ишлар вазирлиги матбуот котиби Мария Захарова бу интервьюни «ўзини ҳалокатга олиб борувчи» ҳамда «ғайриоддий ва кескин тажовузкороналиги билан ҳайратга солувчи» деб атаган.
«У ўта оғир сиёсий вазиятни ҳам жуда профессионал тарзда ҳал қилган», — деди Бристоу билан ишлаган британиялик дипломат The Telegraph нашрига. «Менимча, шундан кейин у Вашингтон ёки Нью-Йоркдаги жиддий позициялардан бирига умид қилиши мумкин эди. Аммо улар бошқаларга насиб қилди».
Бристоу 2021 йилнинг июнь ойида Афғонистондаги элчи этиб тайинланди. «У Афғонистонда бунчалик кам қолишини кутмаган бўлса керак», — деди манба The Telegraph нашрига. «Кобулда катта масъулият талаб қиладиган ишлар бор эди, фикримча, у ўз вазифасини жуда яхши уддаламоқда».
Изоҳ (0)