Эрдўғон «Толибон» билан ҳамкорлик қилишга тайёрлигини билдирди

Туркия «Толибон» ҳаракати вакиллари билан ҳамкорлик қилишга тайёр. Бу ҳақда мамлакат президенти Ражаб Тоййиб Эрдўғон маълум қилди.

«Биз афғон халқининг тинчлигини сақлаш, бу мамлакатда яшаётган турк фуқароларининг фаровонлигини таъминлаш, шунингдек, ўз давлатимиз манфаатларини ҳимоя қилиш учун ҳар қандай турдаги ҳамкорликка тайёрмиз», — деди Эрдўғон.

«Бу мамлакатда ҳокимият тепасида ким бўлишидан қатъи назар, Туркия яхши кунда ҳам ёмон кунда ҳам қардош Афғонистонни қўллаб-қувватлайди», — деди у.

Эрдўғоннинг таъкидлашича, Туркия «Толибон»нинг «мўътадил» баёнотларини маъқуллайди.

Туркия президенти «Толибон» етакчилари билан учрашув ўтказишга тайёрлигини тасдиқлади. «Биз аввалроқ ‘Толибон’ раҳбарларини қабул қилишимиз мумкинлигини айтгандик. Ҳали ҳам шу позицияни сақлаб турибмиз»,— деди президент Эрдўғон.

Унинг сўзларига кўра, Туркия ҳарбийларининг Афғонистонда бўлиб туриши бу мамлакат янги маъмуриятининг халқаро майдонда мавқейини мустаҳкамлашга ёрдам бериши ва унинг ишини осонлаштириши мумкин.

Эрдўғоннинг таъкидлашича, Туркия армияси ҳеч қачон «Афғонистонда жанговар куч» сифатида хизмат қилмаган. У, шунингдек, Кобул аэропортининг хавфсизлигини таъминлашда Туркиянинг иштироки мавзусига ҳам тўхталди. Унинг сўзларига кўра, Анқара ўз режаларини «жойлардаги янги воқеликларга» мувофиқ қурмоқда. Туркия вазиятнинг ривожланишига асосланган ҳолда бу масала бўйича музокараларни давом эттирмоқда.

Эрдўғон Афғонистондаги Туркия фуқароларининг «хавфсизлиги ва осойишталигини» таъминлаш Анқара учун энг устувор вазифа эканини таъкидлади. Президентнинг айтишича, айни пайтда Афғонистондан жами 522 нафар туркиялик эвакуация қилинган.

Туркия президенти шу ҳафта охирида Германия канцлери Ангела Меркель ва Россия президенти Владимир Путин билан Афғонистондаги вазият бўйича музокаралар ўтказилишини эълон қилди.

Аввалроқ Британия мудофаа штаби бошлиғи Николас Картер «Толибон»га Афғонистонни бошқаришга рухсат бериш кераклигини айтганди. Унинг фикрича, «Толибон»нинг ҳозирги аъзолари республикани 90 йилларда босиб олганларидан фарқ қилиши мумкин.

Британиялик генерал «сабрли бўлишни» ва «Толибон» ҳокимятни қандай тасарруф этишини кузатишни таклиф қилди. Унинг қўшимча қилишича, «Толибон» «яна халқаро майдонда ажратиб қўйилишини хоҳламаслиги» аниқ.

Шунингдек, Европа Иттифоқи «Толибон»нинг Афғонистондаги ғалабасини тан олди.