Қашқадарё вилоят прокуратурасида қаршилик чемпион йигит ўлими билан боғлиқ ҳолатга изоҳ берилган матбуот анжуманида Олий суд раиси Козимжон Комилов сўз олиб, Элбек Раҳимов ўлимида гумонланаётганлар иши очиқ суд мажлисида кўриб чиқилишини, жараённи ёритиб жамоатчиликни хабардор қилиш ниятида бўлган ОАВ вакиллари, хусусан, блогерларга барча имконият яратиб берилишини маълум қилди. Бу ҳақда «Дарё» мухбири хабар берди.
«Тергов ишларига аралашишга ҳеч кимнинг ҳақи йўқ. Ким айбдор бўлади, мен буни ҳам билмайман. Лекин гумонланувчилар иши очиқ судда кўрилади ва унда журналист, блогерлар бемалол қатнашиши мумкин бўлади. Уларга жамоатчиликни хабардор қилиш учун барча имконият яратиб берилади», — деди Олий суд раиси Козимжон Комилов.
Эслатиб ўтамиз, 2021 йилнинг 17 август куни Қаршида чемпион йигит ўлдирилгани ҳақида хабар берилганди. Бош прокуратура ахборот хизмати мазкур воқеага муносабат билдириб, ҳолат бўйича Жиноят кодексининг 97-моддаси (қасддан одам ўлдириш) билан жиноят иши қўзғатилганини, гумонланувчи сифатида терговга жалб қилинган 7 нафар кишининг 6 нафари қамоққа олинганини маълум қилганди. Чемпион йигитнинг дўппосланишига гувоҳ бўлганлар воқеа ҳақида 102 қисқа рақамларига қўнғироқ қилиб хабар берилганига қарамасдан, ИИБ ходимлари воқеа жойига жуда кеч етиб келганини айтганди. Бу айбловга изоҳ берган Ички ишлар вазири Пўлат Бобожонов воқеа гувоҳлари 102 қисқа рақамларига хабар бергач, ИИБ ходимлари воқеа жойига 21 дақиқада етиб борганини маълум қилган.
Изоҳ (0)