Qashqadaryo viloyat prokuraturasida qarshilik chempion yigit o‘limi bilan bog‘liq holatga izoh berilgan matbuot anjumanida Oliy sud raisi Kozimjon Komilov so‘z olib, Elbek Rahimov o‘limida gumonlanayotganlar ishi ochiq sud majlisida ko‘rib chiqilishini, jarayonni yoritib jamoatchilikni xabardor qilish niyatida bo‘lgan OAV vakillari, xususan, blogerlarga barcha imkoniyat yaratib berilishini ma’lum qildi. Bu haqda “Daryo” muxbiri xabar berdi.
“Tergov ishlariga aralashishga hech kimning haqi yo‘q. Kim aybdor bo‘ladi, men buni ham bilmayman. Lekin gumonlanuvchilar ishi ochiq sudda ko‘riladi va unda jurnalist, blogerlar bemalol qatnashishi mumkin bo‘ladi. Ularga jamoatchilikni xabardor qilish uchun barcha imkoniyat yaratib beriladi”, — dedi Oliy sud raisi Kozimjon Komilov.
Eslatib o‘tamiz, 2021-yilning 17-avgust kuni Qarshida chempion yigit o‘ldirilgani haqida xabar berilgandi. Bosh prokuratura axborot xizmati mazkur voqeaga munosabat bildirib, holat bo‘yicha Jinoyat kodeksining 97-moddasi (qasddan odam o‘ldirish) bilan jinoyat ishi qo‘zg‘atilganini, gumonlanuvchi sifatida tergovga jalb qilingan 7 nafar kishining 6 nafari qamoqqa olinganini ma’lum qilgandi. Chempion yigitning do‘pposlanishiga guvoh bo‘lganlar voqea haqida 102 qisqa raqamlariga qo‘ng‘iroq qilib xabar berilganiga qaramasdan, IIB xodimlari voqea joyiga juda kech yetib kelganini aytgandi. Bu ayblovga izoh bergan Ichki ishlar vaziri Po‘lat Bobojonov voqea guvohlari 102 qisqa raqamlariga xabar bergach, IIB xodimlari voqea joyiga 21 daqiqada yetib borganini ma’lum qilgan.
Mavzuga doir:
Izoh (0)