Ички ишлар вазири Пўлат Бобожонов қаршилик чемпион йигит ўлимида гумонланганларнинг етти нафари жиноят содир этилган куни — 2021 йилнинг 17 август куни қўлга олинганини, жиноят ташкилотчиси дея тахмин қилинаётган асосий гумонланувчи эса 18 август куни соат 17:05 да Чироқчи туманида қўлга олинганини маълум қилди. Бу ҳақда вилоят прокуратурасида бош прокурор Ниғматилла Йўлдошев, ички ишлар вазири Пўлат Бобожонов ва Олий суд раиси Козимжон Комилов иштирокидаги матбуот анжуманида маълум қилинди, дея хабар қилди «Дарё» мухбири.
«Гумонланувчиларнинг дастлабки уч нафари — бири шифохонада, икки нафари кўчада ушланган. Қолган тўрт нафаридан бири 15:30 да Қарши шаҳридан, яна бири 16:30 да Чироқчи туманининг Чияли қишлоғидан, кейингиси 20:05 да ва тўртинчиси 21:30 да Қарши шаҳридан ушланган. Ўша куни етти нафар гумонланувчи қўлга олинган бўлса, бир нафар асосий гумонланувчи Зуҳриддин Боймирзаев қочиб кетган. Аммо эртаси куни 18 август куни 17:05 да яшириниб ётган еридан, Чироқчи туманидан ушлаб келинган», — дейди ички ишлар вазири.
Вазирнинг айтишича, ҳолат бўйича тергов-суриштирув ишлари бошлаб юборилган бўлиб, воқеа айбдорлари ва ҳолатнинг келиб чиқишига сабабчи бўлган Ички ишлар ходимлари ҳаракатига ҳам ҳуқуқий баҳо берилади.
«Воқеа айбдорларига, воқеанинг келиб чиқишига сабабчи бўлганларга ҳам, албатта, чора кўрилади. Бизда ҳам, прокуратурада ҳам шундай буйруқ бор. Воқеа ҳақида ҳар дақиқада ахборот бериб борамиз», — деди ички ишлар вазири Пўлат Бобожонов.
Матбуот анжуманида сўз олган бош прокурор Ниғматилла Йўлдошев эса воқеа Бош прокуратура томонидан назоратга олиниб, барча маълумотлар прокуратурада жамланаётганини, ОАВ вакиллари ва блогерлар шу масалада ўзларини қизиқтирган барча саволларга Бош прокуратура ахборот хизмати, вилоят прокурори матбуот котиблари орқали маълумот олиши мумкинлигини қўшимча қилди.
Изоҳ (0)