Қаршида чемпион йигитнинг калтакланишига гувоҳ бўлганлар 102 қисқа рақамларига қўнғироқ қилиб, воқеа ҳақида хабар бергач, ИИБ ходимлари воқеа жойига 21 дақиқада етиб борган. Бу ҳақда Қашқадарё вилояти прокуратурасида бўлиб ўтган матбуот анжуманида ички ишлар вазири Пўлат Бобожонов маълум қилди, дея хабар беради «Дарё» мухбири.
«Жиноят содир бўлган куни воқеа ҳақида 102 қисқа рақамига соат 09:49 да хабар берилган бўлса, соат 10:10 да фуқаро кийимидаги Ички ишлар ходимлари етиб борган», — дейди ички ишлар вазири «Дарё»да эълон қилинган фактларга тўхталар экан.
Ички ишлар вазири кузатув камераларини кўриб чиққанини ва воқеа уч дақиқа ичида содир бўлганини, воқеа гувоҳларидан бири аёл бўлишига қарамасдан, жабрланувчига ёрдам беришга уринганини таъкидлаб, бефарқ бўлмаган фуқаронинг ҳаракатига ижобий баҳо берди.
Вазирнинг қайд этишича, воқеа жойига номерсиз қора Gentra’да саккиз нафар киши келган.
«Битта машинада саккиз киши келган. Жабрланувчини ҳам ортиб, тўққиз киши бир машинада кетган. Бу эса жиноят олдиндан режалаштирилиб, катта тайёргарлик кўрилганидан далолат беради», — дейди вазир Пўлат Бобожонов.
Эслатиб ўтамиз, «Дарё»да эълон қилинган мақолада воқеа гувоҳлари 102 қисқа рақамларига қайта-қайта қўнғироқ қилинишига қарамасдан, ИИБ ходимлари воқеа жойига жуда кеч келганини билдирганди.
«Дарё» мухбири билан суҳбатлашган вилоят ИИБ ахборот хизмати раҳбари Ирода Расулова ИИБ ходимларининг воқеа жойига жуда кеч — 40-45 дақиқада етиб келгани ҳақидаги фикрларга жавобан 102 қисқа рақамларига чиқиб, вазиятни тез орада ойдинлаштириб, ИИБ ходимларига қачон чақирув бўлгани ҳамда воқеа жойига қачон етиб борганини ойдинлаштириб беришини маълум қилишига қарамасдан, вазиятга ойдинлик киритмаганди. Вазир Пўлат Бобожонов матбуот анжуманида вилоят ИИБ ахборот хизмати раҳбари шу саволни очиқ қолдиргани учун ҳам ҳолатга ойдинлик киритиб кетишга қарор қилганини билдирди.
«102 га шахсан ўзим уч марта қўнғироқ қилдим. Воқеа ҳақида айтиб, тез етиб келинг, ҳозир ўлдириб қўйишади, дедим. Хўп, ариза қабул қилинди, ёзиб олдик, дея менга қўполлик қилишди. Келаверишмагач, 09:51 да яна телефон қилдим. Яна келишмагач, соат 10:11 да яна тердим. Ҳеч бўлмаса рация орқали хабар бериб, номерсиз қора Gentra‘ни ушланглар, дедим. Хуллас, ИИБ ходимлари воқеа ҳақида хабар берилганидан сўнг ҳам 40-45 дақиқа ўтгач келишди. Улар келишганда эса, безори болалар йигитни яримжон ҳолатда машинага тиқиб олиб кетишганди. Атрофда кўпчилик бор эди, аммо ҳеч ким ёрдам бермади. Мен ҳам қиз бола бўлганим учун йигитларнинг қўлидаги пичоқни кўриб, ёрдамга боролмадим», — деганди «Дарё» мухбири билан суҳбатлашган суҳбатдош.
Журналистлар сўровига жавоб берган Миллий гвардиянинг вилоят бошқармаси қўриқлаш хизмати масъули, техника бўлими бош мутахассиси Баҳром Ёқубов эса маҳалладан Миллий гвардияга соат 09:42 да хабар борганини, Миллий гвардия ходимлари маҳалла идорасига соат 09:47 да етиб келганини очиқлаганди.
Изоҳ (0)