Жиззах вилоятининг Шароф Рашидов туманида Volvo юк машинаси ёниб кетди. Бу ҳақда вилоят ФВБ матбуот хизмати хабар берди.
Маълум қилинишича, 16 август куни соат 22:27 ларда ушбу туман ҳудудидан ўтувчи Тошкент—Термиз М-39 автомагистрал йўлининг 989-километрида ҳаракатланиб кетаётган Volvo юк машинасида ёнғин содир бўлган.
Ёнғин жойига Жиззах вилояти ФВБнинг ёнғин-қутқарув бўлинмаси етиб келган ва ёнғин соат 23:05 да бартараф этилган. Ҳодиса оқибатида юк автомобили ва унга ортилган қурилиш материаллари ёниб зарарланган. Жабрланганлар йўқ.
Аниқланишича, ёнғин юк автомобили шинаси ёрилиши оқибатида юзага келган. Кўрилган моддий зарар миқдори аниқланмоқда.