BMT Xavfsizlik Kengashi “Tolibon” Afg‘onistonni egallab olgani munosabati bilan yig‘ilish o‘tkazadi

Birlashgan Millatlar Tashkiloti (BMT) Xavfsizlik Kengashi 16-avgust kuni ertalab Afg‘oniston masalasida yig‘ilish o‘tkazadi. Bu haqda “RBK” xabar berdi.

Odatda Xavfsizlik Kengashining ertalabki majlislari soat 10:00 da (Toshkent vaqti bilan 19:00) o‘tkaziladi. BMT Bosh kotibi Antoniu Guterrish Afg‘onistondagi vaziyat haqida hisobot beradi.

Avvalroq BMT “Tolibon” fursatdan foydalanib, Afg‘onistonga hujum qilishni to‘xtatishi kerakligini aytgandi. Aks holda, mamlakat xalqaro maydonda yakkalanib qolishi mumkin.

“Hujumlarni to‘xtatish vaqti keldi. Jiddiy muzokaralar boshlash vaqti bo‘ldi. Hozir uzoq davom etadigan fuqarolar urushidan yoki Afg‘onistonning yakkalab qo‘yilishidan saqlanishning ayni vaqti ”, — dedi Guterrish.

Shuningdek, Antoniu Guterrish Afg‘onistonda inson huquqlarining buzilishiga barham berish lozimligini aytdi.

BMT veb-saytidagi ma’lumotlarga ko‘ra, tashkilot Afg‘onistonning jangovar harakatlardan eng ko‘p zarar ko‘rgan tumanlarida “inson huquqlari jiddiy buzilayotgani” haqida xabarlar olmoqda.

“Bosh kotib, ayniqsa, ayollar va qizlarning kelajagi haqida qayg‘urmoqda, ularning huquqlari himoyalangan bo‘lishi kerak”, — deyiladi xabarda.

Bosh kotib, shuningdek, fuqarolar hayotini himoya qilish va gumanitar muammolarni hal qilish maqsadida “Tolibon” tashkilotini va boshqa siyosiy kuchlarni o‘zini tiyishga chaqirdi. Ziddiyatning barcha tomonlari gumanitar tashkilotlarning mamlakatga to‘siqsiz kirishini ta’minlashi kerak, deya qo‘shimcha qildi Guterrish.

Shu bilan birga, avvalroq “Tolibon”ning o‘zi ayollarning o‘qishi va ishlashiga, jurnalistlarning esa mamlakatda bo‘layotgan voqealarni tanqid qilishiga ruxsat berishni va’da qilgan.

15-avgust kuni “Tolibon” Afg‘onistonning butun hududini o‘z nazorati ostiga olganini e’lon qildi. Shu kuni “Tolibon” Kobuldagi prezident saroyiga kirdi. Keyinroq hukumat kuchlari tark etgan barcha davlat muassasalarini va davlat televideniyesini egallab oldi. “Tolibon” televideniye orqali chiqish qilib, fuqarolarni xotirjamlik saqlashga chaqirdi.

“Afg‘onistonda urush tugadi”, — deya e’lon qildi “Tolibon” harakati rasmiy vakili Muhammad Naim Al-Jazeera telekanali efirida.