«Мисли кўрилмаган табиий офат»: Грецияда ўрмон ёнғинлари давом этмоқда (фото)

Грецияда бир неча кундан буён йирик ўрмон ёнғинлари давом этмоқда. Ёнғинлар аномал иссиқлик фонида бошланди — айрим ҳудудларда ҳаво ҳарорати 47 даражагача кўтарилди. Элид ва Аттиканинг марказий ҳудудларида, шунингдек, мамлакатнинг энг машҳур сайёҳлик жойларидан бири бўлган Эвбея оролида ўрмонлар шиддат билан ёнмоқда. Ёнғинлар оқибатида бир неча киши ҳалок бўлган, ўнлаб одамлар жароҳатланган. Энг кўп зарар кўрган ҳудудларда минглаб аҳоли эвакуация қилинди. Ҳукумат бутун мамлакат бўйлаб ўрмонга киришни тақиқлади, тақиқни бузганлар 1000 евро миқдорида жаримага солиниши мумкин.

Август ойининг биринчи ҳафтасида Грецияда жами 150 дан ортиқ фаол ёнғин ўчоғи қайд этилган. Мамлакатда 56 минг гектардан ортиқ майдон ёниб кетган. Ўт қўйишда гумонланиб бир неча киши ҳибсга олинган.

Гретасиянинг кўплаб ҳудудларида, шу жумладан, Афина ва Критда ёнғин давом этиши хавфи сақланиб қолмоқда. Мамлакат охирги 30 йил ичида энг кучли иссиқни бошдан кечирмоқда.

Ҳукумат нафас қисилиши бор одамлар учун ишонч телефонини ўрнатди. Греция ва Европа Иттифоқи расмийлари ёнғинларни иқлим ўзгаришининг таъсири деб атади. Европа Иттифоқи Греция ва Ўрта Ер денгизи бўйидаги бошқа мамлакатларга ўрмон ёнғинларини ўчиришда ёрдам бериш учун ўзининг фуқаро муҳофазаси механизмидан фойдаланди.

Греция бош вазири Кириакос Мизотакис мамлакат халқига мурожаатида ёнғинлар учун узр сўради.

«Аввало, барча хатолар учун узр сўрайман. Мен уйи ёки мол-мулки қандай ёнганини кўрган ватандошларимизнинг қайғусини тўлиқ тушунаман», — деди ҳукумат раҳбари.

Мизотакис ўз мурожаатида сўнгги кунларда мамлакатда 586 ёнғин содир бўлганини айтди ва бу кунларни Греция учун энг қийин кунлардан бири деб атади. «Биз бор кучимиз билан курашдик ва курашишда давом этмоқдамиз. Аммо биз мисли кўрилмаган даражада табиий офатга дуч келдик », — деди у.

Унинг таъкидлашича, ҳукумат ёнғин оқибатида вайрон бўлган уйлар учун компенсация тўлайди, ўрмонлар ҳам тикланади, бунинг учун бюджетдан қўшимча 500 миллион евро ажратилган. Бош вазирнинг сўзларига кўра, инсон ҳаётини сақлаб қолиш — энг муҳим вазифа. «Биз тишни тишга босиб, олдинга силжишимиз керак», — деб хулоса қилди у.