«Толибон» бугунги кунда Афғонистон ҳудудининг 65 фоизини назорат қилмоқда. Бу ҳақда Европа Иттифоқининг юқори лавозимли расмийларидан бири Reuters ва AFP’га маълум қилди.
Манбанинг сўзларига кўра, жангарилар 11 вилоятнинг марказларини босиб олиш билан таҳдид қилмоқда. Америка қўшинларининг мамлакатдан олиб чиқилиши муносабати билан Афғонистон ҳукумат кучларининг имкониятлари сезиларли даражада заифлашган.
Al-Jazira телеканали ахборотига кўра, «Толибон» Афғонистондаги 34 вилоятдан саккизтасининг марказларини бир ҳафтадан кам вақт ичида назоратга олган. Биринчи марказ — Заранж шаҳри 6 августда босиб олинганди.
Маҳаллий Tolo News телеканали манбаларга таяниб, хабар беришича, Афғонистон ғарбида Эрон билан чегара яқинидаги Фараҳ вилоятнинг маркази Фараҳ шаҳрининг катта қисми ҳам «Толибон» томонидан эгаллаб олинган. Хусусан, полиция пости қўлга олинган. «Толибон» матбуот котиби Забиулла Мужоҳиднинг баёнотига кўра, жангарилар Фараҳ марказини эгаллаган.
Июлда «Толибон» Афғонистон чегарасининг 90 фоизини ўз назоратига олганини маълум қилди.
АҚШ ва унинг иттифоқчилари Афғонистондан қўшинларини олиб чиқа бошлагач, «Толибон» республикада кенг кўламли ҳужумлар бошлади. Июль ойининг бошига келиб, Афғонистондан ҳарбий контингентнинг 90 фоиздан ортиғи олиб чиқилди. Байденнинг сўзларига кўра, қўшинларни август охиригача тўлиқ олиб кетиш режалаштирилган.
Аввалроқ Россия Афғонистондаги ҳокимият «Толибон» жангарилари томонидан тўлиқ эгаллаб олиниши сценарийсига тайёрлиги, аммо воқеаларнинг бундай ривожланишини ҳақиқатдан йироқ деб ҳисоблашини маълум қилганди.
Изоҳ (0)