«Толибон» радикал ҳаракати АҚШнинг Афғонистонда ўтиш даври ҳукуматини шакллантириш таклифини қабул қилмасликка қарор қилди, бу ҳақда «РИА Новости»га гуруҳ расмий вакили Забиулла Мужоҳид маълум қилди.
Июль охирида «Толибон» вакиллари АҚШ ва Европа давлатлари делегациялари билан учрашувда Афғонистондаги зиддиятни тинч йўл билан ҳал қилиш масаласини муҳокама қилган эди. Америка томони жангариларга муваққат ҳукумат шакллантирилишини кўзда тутувчи механизмни таклиф қилган, у, АҚШ фикрича, мамлакатда тинчликка тезкорлик билан эришиш имконини бериши керак эди.
«Ҳозирча бу масала кўтарилмади. Лекин умуман олганда, биз ўтиш даври ҳукуматини қабул қилмаймиз. Биз фундаментал ечимни талаб қиламиз ва у топилиши керак. Ўтиш даври ҳукуматини шакллантириш — бизнинг режамиз эмас», — дея жавоб қилди Мужоҳид «Толибон» АҚШ таклифини қабул қиладими деган саволга.
Шунингдек, Мужоҳиднинг айтишича, Кобулни эгаллаб олиш ҳақидаги қарор Афғонистоннинг бошқа ҳудудлари устидан назорат ўрнатилганидан кейингина қабул қилинади.
Аввалроқ Россия президентининг Афғонистон бўйича махсус вакили Замир Кабулов «Толибон» иштирокидаги янги ўтиш даври ҳукуматига асосан Кобулдаги жорий ҳукумат қарши чиқаётганини айтганди. Шунингдек, унга кўра, на «Толибон» ва на Афғонистоннинг жорий раҳбарияти мамлакатни ёлғиз бошқаришга қодир эмас.
Бу орада «Толибон» жангарилари Афғонистон ғарбида, Эрон билан чегарада жойлашган Фараҳ вилоятининг шу номли шаҳрини ҳамда шимолдаги Бағлон вилоятининг маркази — Пули-Хумри шаҳрини эгаллаб олди. Шу тариқа, сўнгги беш кун ичида «Толибон» назорати остига ўтган Афғонистон вилоятлари маъмурий марказлари сони саккизтага етди.
«Толибон» ҳаракати Афғонистон ҳудудининг 80 фоизини назорат қилишини даъво қилмоқда.
БМТ маълумотларига кўра, сўнгги бир ой ичида «Толибон» жангариларининг ҳужумлари оқибатида Афғонистон тинч аҳолисининг мингдан ортиғи ҳалок бўлган.
Изоҳ (0)