Японияда тўфон туфайли қарийб 300 минг аҳоли эвакуация қилинади

Япония ғарбида «Лупит» тўфони сабабли 290 мингдан ортиқ аҳолига хавфсиз жойга кўчиб ўтиш тавсия этилди. Тўфон кўчки ва сув тошқинларини келтириб чиқариши мумкин. Бу ҳақда маҳаллий маъмурият маълумотларига асосланиб, NHK телеканали хабар берди.

Телеканал маълумотларига кўра, тегишли тавсиялар ғарбий Хиросима ва Симане, шунингдек, марказий Айти префектуралари аҳолиси учун амал қилади.

Шунингдек, Япония авиакомпаниялари тўфон туфайли жануби-ғарбга учадиган 63 та рейсни бекор қилгани маълум қилинди.

Япония синоптикларининг аниқлик киритишича, «Лупит» мамлакатнинг ғарбий ҳудудларини тарк этиб, шимоли-шарққа қараб йўл олмоқда. Шамол тезлиги 23 метр/секунддан 35 метр/секундгача кучаяди.

Бир кун аввал Кюсю оролининг шимолий қисмида яшовчи 139 мингга яқин аҳоли, Фукуока префектурасида яшовчи олти минг киши, Оита префектурасида икки минг киши, Кагосима префектурасида 13 минг киши эвакуация тўғрисида хабар олган.

Июль ойи охирида Токио кучли «Непартак» тўфонига дуч келди. Шу муносабат билан, Олимпиада ташкилотчилари тўфон туфайли очиқ сувда сузиш ва триатлон дастурида сузиш мусобақалари қолдирилиши мумкинлиги ҳақида огоҳлантирган.

Аввалроқ Хитойда сув тошқини туфайли 100 минг киши эвакуация қилинганди, метрони сув босиши оқибатида 12 киши ҳалок бўлган.

АҚШнинг Орегон штатида эса йирик ўрмон ёнғинлари туфайли минглаб одамларни шошилинч равишда эвакуация қилишга тўғри келган.