АҚШ президенти Жо Байден «Толибон»нинг позициялари кучайганига қарамай, Афғонистондан қўшинларни олиб чиқиш режаларини ўзгартирмоқчи эмас. Бу ҳақда The New York Times хабар берди.
Бундан олдин, Байден маъмурияти зиддиятни ҳал қилиш бўйича музокараларни давом эттирар экан, Афғонистон ҳукумати «Толибон»га қаршилик кўрсатиш учун куч ва ресурсларга эга эканига умид билдирганди. Бироқ 8 август куни «Толибон» республика шимолий вилоятларининг бирйўла учта маъмурий марказини — Қундуз, Сарипул ва Талуканни эгаллаб олди.
Шунга қарамай, АҚШ президенти маъмуриятининг стратегияси «ўзгаришсиз қолмоқда», деди юқори мартабали амалдор. Унинг қўшимча қилишича, Пентагон керак пайтда Афғонистон ҳукуматини зарур ресурслар билан таъминлаш режаларидан воз кечмайди.
АҚШ ва унинг иттифоқчилари Афғонистондан қўшинларини олиб чиқа бошлагач, «Толибон» республикада кенг кўламли ҳужумлар бошлади. Июль ойининг бошига келиб, Афғонистондан ҳарбий контингентнинг 90 фоиздан ортиғи олиб чиқилди. Байденнинг сўзларига кўра, қўшинларни август охиригача тўлиқ олиб кетиш режалаштирилган.
«Толибон» Афғонистон чегарасининг 90 фоизи ва мамлакатнинг кўп қисмини ўз назоратига олганини маълум қилди.
«Толибон» ҳужумлари фонида АҚШ Афғонистонга ўзининг B-52 Stratofortress бомбардимончиларини юборди. Республика Мудофаа вазирлиги маълумотларига кўра, улар бир кун олдин жангариларга шимолий Жузжон вилояти пойтахти Шибирғонда ҳужум уюштирган. Ундан олдин, жангарилар у ердаги маъмурият ва полиция биносига бостириб кирган, лекин охир -оқибат, маҳаллий хавфсизлик кучлари ўз позицияларини қайтариб олган.
Аввалроқ Россия Афғонистондаги ҳокимият «Толибон» жангарилари томонидан тўлиқ эгаллаб олиниши сценарийсига тайёрлиги, аммо воқеаларнинг бундай ривожланишини ҳақиқатдан йироқ деб ҳисоблашини маълум қилганди.
Изоҳ (0)