Токио—2020 Олимпиадасида -109 кг вазн тоифаси вакиллари ўртасида мусобақалар 3 август куни бўлиб ўтди.
Фото: «Дарё» / Getty Images
Ўзбекистонлик спортчи Акбар Жўраев даст кўтаришда 193 кг вазнни бўйсундирди. Бу босқичда Арманистон вакили Симон Мартиросян 195 кг тошни кўтариб, рекорд ўрнатди. Жўраев эса иккинчи ўринни олди.
Силтаб кўтаришда 237 килограммни кўтарган Акбар умумий 430 кг вазнни бўйсундирди. Бу билан 21 ёшли Жўраев биринчи натижани қайд этиб, олтин медалга сазовор бўлди. Шунингдек, Жўраев силтаб кўтариш ва икки курашда Олимпия рекордини ўрнатди. Мартиросян эса дастлабки уринишда 228 кг вазнни кўтарди, қолган икки уринишда 238 килограммни кўтара олмади.
Шу тариқа Ўзбекистон делегациясининг медаллари сони учтага етди. Аввалроқ таэквондочи Улуғбек Рашидов олтин медалга эга чиққан, дзюдочи Давлат Бобонов эса бронзани қўлга киритганди.
Маълумот учун, Акбар Жўраев 1999 йилнинг 8 октябрда Тошкент вилоятининг Бўстонлиқ туманида туғилган. Фаолияти мобайнида ўсмирлар ўртасидаги Жаҳон чемпионатида (2019) ғолиб бўлган. 2019 ва 2020 йилги Осиё чемпионатида кумуш медалига сазовор бўлган.
Скрин: ХОҚ
