Япониянинг Токио шаҳри мезбонлик қилаётган Олимпия ўйинларида ўзбекистонлик спортчилар 31 июль кунги чиқишларини якунлади.
Дзюдо
Яккалик баҳслари якунлангач, 31 июль куни аралаш жамоавий беллашувлар ўтказилди. Дастлабки босқичда ўзбекистонлик спортчиларга Нидерландия терма жамоаси тўқнаш келди. Беллашувлар Бекмурод Олтибоевнинг (+90 кг) ишончли ғалаба билан бошланди. Бешинчи жангга келиб Давлат Бобонов масалани ҳал қилиши мумкин эди, бироқ терма жамоанинг энг кучли вакилларидан бири кутилмаганда рақибига имкониятни бой бериб қўйди.
Фото: Getty Images
Асосий баҳсларда ҳисоб 3:3 кўринишини олди. Қўшимча жангда иштирок этиш масъулияти Олтибоев зиммасига тушди. Бекмурод бу сафар рақибини таслим қила олмади: Ўзбекистон вакили учта шидо олгач, Нидерландияга ғалаба ёзилди. Шу тариқа ўзбекистонлик дзюдочиларнинг Олимпиададаги иштирокига расман якун ясалди.
Бокс
Рио—2016 Олимпиадаси чемпиони Шаҳобиддин Зоиров (-52 кг) 1/8 финалда Кабо-Верде вакили Варела Даниэлга қарши рингга кўтарилди ва ишончли ғалаба билан чорак финалга чиқди. Унинг кейинги босқичдаги рақиби филиппинлик Карло Паалам бўлади. Жанг 3 август куни ўтказилади.
Фото: Getty Images
-63 кг вазн тоифасида Ўзбекистон шарафини ҳимоя қилаётган Элнур Абдураимов 1/8 финалда тожикистонлик Баҳодур Усмоновга қарши жанг қилди. Унда Элнур 5:0 ҳисобидаги ғалаба орқали кейинги босқичга йўл олди. Чорак финалда Адураимовни арманистонлик кучли боксчи Ҳовҳаннес Бачковга қарши жанг кутиб турибди. Бу беллашув ҳам 3 август санасига белгиланган.
Ўқ отиш
Мухтасар Тоҳирова 50 метрдан 3 ҳолатда ўқ отиш дастурида ўз иштирокини ўтказди. Ўзбекистонлик спортчи учала дастурда умумий 1155 очко тўплаб, 37 спортчи орасида 30-ўринни эгаллади ва финал босқичига йўлланма ола билмади.
Фото: МОҚ
Шу тариқа Тоҳирова учун ҳам Олимпия ўйинлари якунланди. Аввалроқ у 10 метр масофада ўтказилган мусобақада ҳам иштирок этганди.
