Токио—2020. 7 та гол урилган ўйинда Испания Кот-д’Ивуарни мағлуб этиб ярим финалга йўл олди. 9 та гол киритилган баҳсда эса Жанубий Корея Мексикага енгилди

Токио—2020 Олимпиадаси футбол баҳсларининг чорак финал ўйинлари 31 июль, шанба куни бўлиб ўтди.

Испания Кот-д’Ивуар термаси билан тўқнаш келиб, қўшимча дақиқаларда ғалабани ўз томонига оғдириб олди. Учрашувда умумий ҳисобда 7 та гол киритилди. Захирадан ўйинга қўшилган испанлар ҳужумчиси Рафа Мир ҳет-трик муаллифига айланди.

Мезбон Япония 1/4 финалда Янги Зеландия билан тўқнаш келди. Учрашувнинг асосий вақти ва қўшимча бўлимларда дарвозалар дахлсиз қолди. Пенальтилар сериясида омад кун чиқар юрт вакилларига кулиб боқди.

Бразилия Мисрга қарши баҳс юритиб, минимал ҳисобдаги ғалабани тантана қилди.

Чорак финалнинг сўнгги беллашувида Жанубий Корея ва Мексика вакиллари ўзаро баҳс олиб борди. Голларга бой бўлган ўйин мексикаликларнинг ғалабаси билан якунланди.

Шу тариқа Токио Олимпиадаси футбол баҳсларининг ярим финалчилари аниқланди. Учрашувлар 3 август куни бўлиб ўтади. 1/2 финал жуфтликлари қуйидагича кўриниш олди:

• Мексика — Бразилия
• Япония — Испания.