Facebook, Google ва Netflix компаниялари коронавирусга қарши мажбурий вакцинация жорий қилди

Facebook ва Google компанияларининг маълум қилишича, масофадан ишлаётган ходимлар офисга қайтишидан аввал коронавирусга қарши эмланиши лозим. Netflix актёрлар ва съёмка майдонида улар билан алоқада бўладиган бошқа ходимларни мажбурий вакцинациядан ўтказиш ҳақида эълон қилди. Ушбу компанияларда шу пайтгача қанча ходим эмлангани ҳақида маълумот берилмаган.

Google бош директори Сундара Пичайнинг айтишича, ходимларни мажбурий эмлаш талаби аввал АҚШдаги офисларга тааллуқли бўлади, кейинчалик эса бошқа мамлакатлардаги бўлинмаларга татбиқ этилади. Компания ходимлари маҳаллий қонунларга мувофиқ эмланади, дея хабар берди AFP.

Facebook ҳам шу каби чораларни киритди. «Биз АҚШдаги исталган офисимизга ишлаш учун келадиганларнинг барчасидан эмланишни талаб қиламиз», — деди кадрлар билан ишлаш бўйича вице-президент Лори Гоулер. Унинг сўзларига кўра, компания тиббий ва бошқа сабабларга кўра эмлана олмайдиганларни ишга қайтариш масаласини кўриб чиқади.

Netflix актёрлар ва съёмка майдонларидаги ишчилар COVID-19’га қарши эмланишни мажбурий этиб қўйди, тиббий ва диний сабабларга кўра ёки ёш чекловлари сабаб эмланишдан бош тортиш мумкин, дея хабар берди Hollywood Reporter.

Шунингдек, аввалроқ яратиш бошланган лойиҳалар иштирокчилари вакцина олмай туриши мумкин. Компания Кино ва телевидение продюсерлари альянси, Киноактёрлар гильдияси — Америка телевизион ва радио ижодкорлари федерацияси, касаба уюшмалари ва соҳанинг бошқа ташкилотлари билан қоидаларни келишиб олди.

Пандемия бошидан буён Қўшма Штатларда 34,6 миллион кишида коронавирус аниқланди, 611,8 минг киши касалликдан вафот этди. Касалланиш ва ўлимлар сони бўйича АҚШ дунёда биринчи ўринда туради.

Жаҳон соғлиқни сақлаш ташкилоти маълумотларига кўра, сўнгги бир ҳафта ичида дунёда COVID-19 билан касалланиш 8 фоизга, ўлим даражаси эса 21 фоизга ошган.