Атоқли олим, Ўзбекистон Фанлар академияси академиги Нусрат Парпиев 90 ёшида вафот этди, деб хабар беради ЎзА.

Фото: ЎзА

Нусрат Парпиев 1931 йилнинг 14 октябрида Тошкент шаҳрида туғилган. 1953 йилда Ўрта Осиё давлат университетини, 1956 йилда Москва давлат университетининг аспирантурасини тамомлаган.

Бўлғуси олим ўз меҳнат фаолиятини Фанлар академиясининг Ядро физикаси институтида кичик илмий ходим сифатида бошлаган ва қарийб 70 йиллик фаолияти давомида Кимё институти, Ўрта Осиё нефтни қайта ишлаш саноати илмий-текшириш институти, Бухоро озиқ-овқат ва енгил саноат технологияси институти, Тошкент кимё-технология институти, Ўзбекистон Миллий университетида масъул лавозимларда меҳнат қилиб, мамлакатда ноорганик кимё соҳасидаги долзарб масалаларни тадқиқ этиш, юқори малакали кадрлар тайёрлаш ишига муносиб ҳисса қўшган.

Нусрат Парпиевнинг муаллифлигида комплекс бирикмалар кимёси йўналишига бағишланган 750 дан зиёд илмий мақолалар, 7 та монография, 22 та муаллифлик гувоҳномаси ва 3 та патент юртимиз ва хорижий мамлакатлар олимлари ва мутахассислари томонидан юксак эътироф этилган.

Унинг раҳбарлигида 50 дан ортиқ фан номзодлари ва фан докторлари тайёрланган.

Аввалроқ Ўзбекистон Фанлар академияси академиги Мирҳожи Асқаров 89 ёшида, академик Раъно Убайдуллаева 84 ёшида, академик Шавкат Акмалхонов 87 ёшида вафот этгани тўғрисида хабар берилганди. Шунингдек, Ўзбекистон Республикаси Фанлар академияси академиги, адабиётшунос олим Тўра Мирзаев 2020 йил 29 сентябрь куни 84 ёшида, Ўзбекистонда хизмат кўрсатган фан арбоби, Ўзбекистон Республикаси Фанлар академияси академиги Турсунбой Рашидов 7 октябрь куни 86 ёшида вафот этганди.