29 июль куни Жаҳон соғлиқни сақлаш ташкилотининг COVAX дастури орқали Ўзбекистонга АҚШнинг Алабама штатидан вакциналар партияси олиб келинади, деб хабар беради «Дунё» агентлиги.
Ўзбекистон элчихонасининг маълумотларига кўра, АҚШ коронавирусга қарши Moderna компаниясининг 3 миллион дозасини бепул тақдим этади.
АҚШ Касалликлар назорати ва профилактикаси марказининг маълумотларига кўра, Moderna компаниясининг вакцинаси коронавирусга қарши 94 фоиз самарадорликка эга. АҚШнинг FDA бошқармаси эса Moderna вакцинасидан 18 ва ундан катта ёшдагиларда фойдаланишга рухсат берган. Мазкур вакцина мушак ичига юборилади. Вакцинация курси икки дозадан иборат бўлиб, бир ой фарқ билан қилинади.
Moderna вакцинасини Pfizer ва BioNTech фармацевтика компанияларининг дори воситаларидан фарқли равишда уни нормал совуқ ҳароратда сақлаш мумкин, бу эса уни Ўзбекистон вилоятлари бўйлаб тарқатилишини осонлаштиради.
Аввалроқ Ўзбекистонга яна 1 миллион доза ZF-UZ-VAC2001 ва 50 минг доза AstraZeneca вакциналари олиб келинган эди.
Эслатиб ўтамиз, 23 июль куни Шавкат Мирзиёев аҳоли мурожаатлари билан ишлаш тизимини янгича ташкил қилиш чора-тадбирлари бўйича видеоселектор йиғилишида халққа мурожаат қилиб, коронавирус пандемиясидан огоҳ бўлишга чақирди.
Изоҳ (0)