Тожикистон Мудофаа вазирлигининг Афғонистон билан чегара яқинида жойлашган ҳарбий полигонларига Тожикистон ҳукумати бугунги кунда, тахминан, 100 минг афғонистонлик қочқинларни қабул қилиб, жойлаштириши мумкин. Бу ҳақда Республика Фавқулодда вазиятлар қўмитаси раҳбарининг ўринбосари, полковник Имомали Иброҳимзода маълум қилди, деб ёзади Asia-Plus.
Унинг сўзларига кўра, заруриятга қараб мамлакат Афғонистондан келадиган янада кўпроқ қочқинларни қабул қилиши мумкин. «Биз халқаро ташкилотлар билан республиканинг афғонистонлик қочқинларни қабул қилиш салоҳиятини ўрганиб чиқяпмиз», — деди полковник.
Унинг айтишича, энг яқин орада Кушониён тумани ва Хорог шаҳри ҳудудида иккита махсус омбор фойдаланишга топширилади, у ерда потенциал афғонистонлик қочқинлар учун чодирлар, кўрпа-тўшаклар, гигиена воситалари, идиш-товоқ сақланади.
Полковникнинг айтишича, июлда Тожикистонда 1574 нафар қочқин бошпана топган, улар мамлакат ҳукумати ҳисобидан тиббий ёрдам, яшаш учун чодирлар, уч марталик иссиқ овқат, кўрпа-тўшак, ошхона жиҳозлари билан таъминланган.
«Ушбу қочқинлар 11 та чартер авиарейси орқали ўз ватанига, Кобул ва Мозори-Шариф шаҳарларига қайтариб юборилган эди», — деди Иброҳимзода.
Аввалроқ Тожикистоннинг Жайҳун туманида афғонистонлик қочқинларни вақтинчалик жойлаштириш учун база қуришга махсус жой ажратилгани хабар берилган эди.
Эслатиб ўтамиз, 13—14 июль кунлари Тожикистондаги Тоғли Бадахшон мухтор вилоятининг Мурғоб тумани Қизил-Работ қишлоқ жамоати орқали қирғиз миллатига мансуб 347 нафар Афғонистон фуқароси Тожикистон чегарасини кесиб ўтганди. Кейинроқ уларнинг барчаси, улардан аввалроқ чегарани кесиб ўтган афғон қочқинларининг қолганлари ҳам ўз ватанига қайтган.
Аввалроқ Бирлашган Миллатлар Ташкилоти (БМТ)нинг Қочқинлар иши бўйича бошқармаси Афғонистондаги вазиятнинг кескинлашиши мамлакатни ташлаб чиқувчиларнинг йирик оқимига сабаб бўлишидан хавотир билдирган эди.
Изоҳ (0)