Франция парламенти оммавий норозилик намойишлари фонида 24 июль, шанба куни мамлакатда санитария ҳужжатини жорий этишни кўзда тутадиган қонуннинг баъзи низомларини юмшатишга қарор қилди, деб ёзади «Korrespondent.net».
Франция ҳукумати коронавирусга қарши вакцинацияни тезлаштириш мақсадида 30 августдан 12 ёшдан ошган фуқаролар учун санитария ҳужжатларини жорий қилишни режалаштирган эди. Ҳужжат аксарият жамоат жойлари, шу жумладан, шаҳар ва шаҳарлараро транспортдан фойдаланиш ҳуқуқини беради.
Бундай ҳужжатни олиш учун французлар COVID-19’га қарши тўлиқ эмланиши ёки яқинда олинган манфий натижали тестни тақдим этиши керак. Бундан ташқари, қонун барча тиббиёт ходимларига коронавирусга қарши эмланиш мажбуриятини юклайди, акс ҳолда улар ишдан бўшатилади.
Бундай ташаббус аҳоли орасида салбий муносабатни келтириб чиқарди, шу сабабли мамлакатнинг турли шаҳарларида минглаб одамлар кўчаларга чиқиб, ўз норозилигини билдирди. Намойишчиларнинг сони 160 мингдан ортиқ дея баҳоланди.
Шу муносабат билан Франция Сенати аъзолари ушбу қонунни юмшатиш учун баъзи тузатишларни киритди. Хусусан, санитария ҳужжатлари фақат катталар учун мажбурий бўлди, кафе ва ресторанлар айвонларига эса бемалол кириш мумкин (ҳужжатсиз), қонун эса 30 августдан эмас, 15 сентябрдан кучга киради.
Аввалроқ Францияда коронавируснинг тўртинчи тўлқини бошлангани эълон қилинганди. Коронавирус билан касалланиш ҳолатлари сони бир ҳафтада 125 фоизга ошган. 80 фоиз ҳолатларда одамлар дельта штаммга чалинмоқда.
Изоҳ (0)