2022 йилдан бошлаб Мальдив оролларидан самолётда учиб кетаётган фуқароларнинг барчаси чиқиш солиғи тўлайди. Тегишли фармон 11 июль куни Мальдив ороллари президенти Иброҳим Муҳаммад Солиҳ томонидан имзоланган, деб ёзади Meduza.
Мальдивнинг Raajje нашрида қайд этилишича, оролни эконом-классда тарк этиш учун Мальдив фуқаролари бир кишига 12 доллар, чет элликлар 30 доллар тўлайди. Фуқаролигидан қатъи назар, бизнес-классдаги йўловчилар учун солиқ 60 долларини, биринчи классдаги йўловчилар учун 90 долларни, хусусий самолётда кетувчилар учун 120 долларни ташкил этади.
Бундан ташқари, 2022 йилдан бошлаб Велана аэропорти орқали жўнаб кетувчилар аэропортни ривожлантириш учун тўлов деб аталадиган 25 долларлик солиқни тўлаши керак. Велана — Мальдивдаги энг йирик халқаро аэропорт бўлиб, у пойтахт Мале яқинида жойлашган.
Солиқ йиғиш учун авиакомпаниялар жавобгар бўлади. Дипломатик мақомга эга йўловчилар ва икки ёшга тўлмаган болалар тўловдан озод қилинади.
Мальдив оролларида 17 та аэропорт мавжуд, улардан тўрттаси халқаро. Ҳозирги вақтда Мальдив оролларида ҳар бир йўловчи учун аэропорт солиғи 15 долларини ташкил этади.
2021 йил 1 январдан 25 июнгача Мальдив оролларига 500 мингга яқин сайёҳ ташриф буюрди. Уларнинг аксарияти Россиядан (24,3 фоиз ёки 120 минг киши) ва Ҳиндистондан (18 фоиз ёки 90 минг киши) келган.
Аввалроқ Мальдив ороллари сайёҳлар оқими туфайли аҳолисининг тинчи ва экологияси бузилаётган мамлакатлар қаторига киритилганди.
Мавзуга доир: Мальдив ороллари сайёҳларни қабул қилишни бошлади
Изоҳ (0)