2022-yildan boshlab Maldiv orollaridan samolyotda uchib ketayotgan fuqarolarning barchasi chiqish solig‘i to‘laydi. Tegishli farmon 11-iyul kuni Maldiv orollari prezidenti Ibrohim Muhammad Solih tomonidan imzolangan, deb yozadi Meduza.
Maldivning Raajje nashrida qayd etilishicha, orolni ekonom-klassda tark etish uchun Maldiv fuqarolari bir kishiga 12 dollar, chet elliklar 30 dollar to‘laydi. Fuqaroligidan qat’i nazar, biznes-klassdagi yo‘lovchilar uchun soliq 60 dollarini, birinchi klassdagi yo‘lovchilar uchun 90 dollarni, xususiy samolyotda ketuvchilar uchun 120 dollarni tashkil etadi.
Bundan tashqari, 2022-yildan boshlab Velana aeroporti orqali jo‘nab ketuvchilar aeroportni rivojlantirish uchun to‘lov deb ataladigan 25 dollarlik soliqni to‘lashi kerak. Velana — Maldivdagi eng yirik xalqaro aeroport bo‘lib, u poytaxt Male yaqinida joylashgan.
Soliq yig‘ish uchun aviakompaniyalar javobgar bo‘ladi. Diplomatik maqomga ega yo‘lovchilar va ikki yoshga to‘lmagan bolalar to‘lovdan ozod qilinadi.
Maldiv orollarida 17 ta aeroport mavjud, ulardan to‘rttasi xalqaro. Hozirgi vaqtda Maldiv orollarida har bir yo‘lovchi uchun aeroport solig‘i 15 dollarini tashkil etadi.
2021-yil 1-yanvardan 25-iyungacha Maldiv orollariga 500 mingga yaqin sayyoh tashrif buyurdi. Ularning aksariyati Rossiyadan (24,3 foiz yoki 120 ming kishi) va Hindistondan (18 foiz yoki 90 ming kishi) kelgan.
Avvalroq Maldiv orollari sayyohlar oqimi tufayli aholisining tinchi va ekologiyasi buzilayotgan mamlakatlar qatoriga kiritilgandi.
Mavzuga doir: Maldiv orollari sayyohlarni qabul qilishni boshladi
Izoh (0)