Хитой COVID-19 келиб чиқиши юзасидан ўтказиладиган текширувнинг иккинчи босқичи бўйича Жаҳон соғлиқни сақлаш ташкилоти (ЖССТ) томонидан таклиф қилинган режага амал қилмайди. Пекин текширув режасининг шаклини илм-фанга ва соғлом фикрга ҳурматсизлик деб билади. Бу ҳақда Хитой Соғлиқни сақлаш давлат қўмитаси раҳбарининг ўринбосари Цзэн Исинга таяниб «Коммерсантъ» хабар берди.
«Текширувнинг иккинчи босқичи ҳақидаги таклифга келсак, унда илм-фан ва соғлом фикрни ҳурмат қилмайдиган шаклдан фойдаланилган. Биз ушбу режага амал қилмаймиз. Хитой ҳукумати илмий текширувларни қўллаб-қувватлайди. Биз вируснинг келиб чиқиши бўйича текширувни сиёсийлаштиришга қаршимиз», — деди Исинь матбуот анжуманида. Унинг фикрига кўра, текширувнинг иккинчи босқичи биринчи босқич натижаларига асосланиши керак.
Ухань вирусология институтининг баёнотига кўра, улар вирусни ҳеч қачон сунъий равишда яратмаган. Ухань миллий биологик хавфсизлик лабораториясининг директори, институт илмий ходими Юань Чжиминнинг даъво қилишича, 2019 йил декабрь ойининг охиригача институт «COVID-19 билан юзлашмаган» ва шу пайтгача бирон-бир ходим ёки талаба коронавирус билан касалланмаган.
«2019 йил 31 декабрга қадар Ухань вирусология институти COVID-19’ни ўрганмаган ҳам, учратмаган ҳам. Институт ҳеч қачон COVID-19’ни синтезламаган, яратмаган ва тарқатмаган. Учинчидан, шу пайтгача институтнинг бирон-бир ходими ёки талабаси COVID-19 билан касалланган эмас»,— деди Чжимин брифингда. Унинг фикрича, коронавируснинг сунъий яратилгани ёки унинг лабораториядан сизиб чиққани ҳақида далиллар йўқ.
Июнь ойида ЖССТ раҳбари Тедрос Гебрейесус ташкилот COVID-19 келиб чиқиши бўйича текширувнинг иккинчи босқичига тайёргарлик кўраётганини маълум қилганди. Гебрейесус бунинг учун Хитойдан ошкоралик ва ҳамкорлик талаб этилишини айтган. Текширувнинг биринчи босқичида Ухань вирусология институтига ташриф буюрган мутахассислар коронавируснинг институт лабораториясидан тарқатилгани «эҳтимоли жуда кам» деган хулосага келганди.
COVID-19’нинг сунъий келиб чиқиши версияси АҚШда бир неча бор илгари сурилган. Хусусан, собиқ президент Дональд Трамп разведка хизматларида вирус Ухандаги лабораториядан сизиб чиққани тўғрисида етарли далиллар мавжудлигини таъкидлаган. Бироқ махсус хизматлар бунга бевосита далиллари йўқлигини билдирган.
Май ва июнь ойларида эса Америка оммавий ахборот воситаларида коронавирус Ухань шаҳридаги лабораторияда яратилганидан далолат берувчи белгилар ҳақида материаллар пайдо бўла бошлади.
Шунингдек, британиялик ва норвегиялик олимлар Ангус Далглиш ва Биргер Сёренсен COVID-19 одамлар томонидан яратилганига оид далиллар борлигини айтди. Уларнинг фикрига кўра, COVID-19 лабораторияда яратилган, шундан сўнг хитойлик олимлар «изларни яшириш учун» вируснинг кўршапалаклардан келиб чиққани тўғрисидаги версияни илгари сурган.
Изоҳ (0)