Украина президенти Владимир Зеленский 30 август куни АҚШга расмий ташриф билан боради ва америкалик ҳамкасби Жо Байден билан учрашади. Бу ҳақда Оқ уй матбуот котиби Жен Псакига таяниб «РБК» хабар берди.
«Ушбу ташриф Донбасс ва Қримда давом этаётган Россия тажовузи шароитида АҚШ Украинанинг суверенитети ва ҳудудий яхлитлигини, шунингдек, энергетик хавфсизлик бўйича яқин ҳамкорликни доимий равишда қўллаб-қувватлашинининг исботи бўлади», — деди Псаки.
Унинг сўзларига кўра, музокараларда «Зеленскийнинг коррупцияга қарши курашиш ва умумий демократик қадриятларга асосланган ислоҳотлар дастурини амалга ошириш борасидаги саъй-ҳаракатлари» Вашингтон томонидан қўллаб-қувватланиши муҳокама қилинади.
Июнь ойида Байден Зеленскийга АҚШга келишни таклиф қилганди. Ўшанда президентлар телефон орқали суҳбатлашган ва суҳбат давомида Америка президенти ушбу таклифни билдирган. Кейинчалик Украина ташқи ишлар вазири Дмитрий Кулеба Зеленский ва Байден ўртасида учрашув июль ойи охирига режалаштирилганини айтди.
Бунга қадар Киев Зеленскийнинг Байден билан музокараларини АҚШ президенти Россия президенти Владимир Путин билан 16 июнь куни бўлиб ўтган Женевадаги саммитга боришидан олдин ташкил этишни режалаштирган эди. 7 июнь куни Зеленскийнинг ўзи Axios’га берган интервьюсида Байден билан Женевадаги саммитдан олдин гаплашиш ниятидалигини айтган. Украина президенти Байденнинг бандлигини ҳисобга олган ҳолда бундай музокаралар ҳар қандай шаклда ўтказилиши мумкинлигини таъкидлаган, аммо унинг шахсий фикрига кўра, «бу каби маслаҳатлашувлар юзма-юз бўлиб ўтиши керак, чунки кўп нарсаларни телефон орқали муҳокама қилиб бўлмайди».
Зеленский 2019 йилда ҳам АҚШга расмий ташриф билан борган. Ўшанда Украина президенти БМТ Бош ассамблеясида сўзга чиққан. Сессия доирасида Зеленский АҚШнинг ўша пайтдаги президенти Дональд Трамп билан музокаралар ўтказишга муваффақ бўлган.
Ўша йилнинг ноябрь ойида Трамп Зеленскийни Оқ уйда меҳмон қилишга тайёрлигини бирдирди, бироқ ташриф амалга ошмаган.
Изоҳ (0)