Россия ташқи ишлар вазири Сергей Лавров ишонтиришича, Россия томони «Толибон» гуруҳи позицияларининг кучайиши фонида Афғонистонга қўшин киритишни режалаштирмаяпти. Бу ҳақда у «Интерфакс»га берган интервьюсида маълум қилди.
«Афғонистон ҳудуди бўйлаб қандайдир маҳаллий зарбалар ҳақида ҳеч ким гапиргани йўқ, Афғонистонга бостириб кириш эса ҳеч кимнинг хаёлига ҳам келгани йўқ. Сиз бизни америкаликлар билан ёки биз совет давридан ‘олиб келган’ тажриба билан адаштиряпсиз», — дея аниқлик киритди Лавров.
Вазирнинг сўзларига кўра, Россия ТИВ бошқа мамлакатларнинг хавфсизлиги уларнинг миллий мафкура доирасидаги ички келишувлари томонидан таъминланиши керак, деган фикрда.
Шунингдек, Лавров маълум қилишича, Россия АҚШга Афғонистондаги вазият юзасидан ўзининг Тожикистон ва Қирғизистондаги базаларидан фойдаланишни таклиф қилмаган.
Москва Афғонистонда юз бераётган воқеалар ҳақида минтақадаги базалари орқали олинаётган маълумотларни ушбу мамлакатда жойлашган базалардан юборилаётган ахборот билан айирбошлашга тайёр.
«Коллектив хавфсизлик ҳақидаги шартнома ташкилотининг коллектив жавоб кучларининг бир қисми бўлган базаларга қандай қилиб америкаликларни таклиф қилишимиз мумкин?… Битта томон 28 та учун қабул қиладиган бир вазиятда биз ўзимизни мажбуриятларимизга мувофиқ тутамиз. Коллектив хавфсизлик ҳақидаги шартнома ташкилоти кучларининг бир қисми бўлган базага иттифоқдошларимизни хабардор қилмасдан ҳеч кимни таклиф эта олмаймиз», — деди Лавров.
Шу билан бирга, вазир қайд этишича, Москва «Афғонистон бўйича Россия—Хитой—АҚШ ‘учлиги’, Покистон ҳам қўшилган ҳолатдаги ‘кенгайтирилган учлик’ ҳамда бошқа форматларда алоқаларни давом эттириш доирасида Афғонистон еридаги ҳақиқий вазият тўғрисида маълумот алмашиш ва вазият тинчланишига кўмаклашишга тайёр».
Аввалроқ Россия Афғонистондаги вазият туфайли Тожикистондаги ҳарбий базасидан фойдаланишга тайёрлигини билдирганди. 20 июль куни эса Россия Афғонистон чегарасига ҳарбий техникасини жойлаштирди.
Россия танклари полигонда 5—10 август кунлари бўлиб ўтадиган ўқув машғулотларида қатнашиш учун етиб келган. Машғулотларда Россия ва Тожикистон ҳарбий хизматчиларидан ташқари, Ўзбекистон Қуролли Кучлари ҳам иштирок этади.
Машғулотлар Афғонистондаги вазиятнинг кескинлашуви фонида ўтказилмоқда.
Афғонистон ҳукумати кучлари ва «Толибон» ўртасидаги тўқнашувлар АҚШ ўз қўшинларини Афғонистондан олиб чиқишни бошлагач кучайди.
Афғонистондан НАТО қўшинларини олиб чиқиш 29 апрелда бошланган, АҚШ ва «Толибон» ўртасида тузилган келишувга биноан жараён кузда якунланиши керак. Сўнгги маълумотларга кўра, АҚШ Афғонистондаги ҳарбий контингентининг 90 фоиздан кўпроғини олиб чиқиб кетди.
Германия, Италия ва Австралия эса Афғонистондан ўз қўшинларини олиб чиқишни якунлади.
Изоҳ (0)