Afg‘oniston muammosining harbiy yechimi yo‘q, mamlakatdagi vaziyatdan chiqishning tinch yo‘lini topish kerak. Tojikiston prezidenti Emomali Rahmon shunday fikrda, deb yozadi “Interfaks”.
“Qo‘shni davlat Afg‘oniston Islom Respublikasida, ayniqsa uning mamlakatimiz bilan chegaradosh shimoliy viloyatlarida vaziyat o‘ta og‘ir va noaniq bo‘lib qolmoqda, ularning ahvoli kun sayin, hatto soat sayin yomonlashmoqda”, — dedi Emomali Rahmon mamlakat harbiy va xavfsizlik kuchlari shaxsiy tarkibiga qilgan murojaatida.
“Bu mamlakatning siyosatchilari, barcha siyosiy partiyalar va harakatlar rahbarlari, ziyolilar, taniqli shaxslar va butun xalqi birlashib, o‘z vatani, davlati va millatini beqarorlik hamda tanazzuldan qutqaradigan vaqt keldi”, — dedi Tojikiston rahbari.
Uning so‘zlariga ko‘ra, bunday fojiali voqealar uchun afg‘onistonliklar aybdor emas.
“Ushbu buzg‘unchi jarayonlar qo‘shni davlatimizning ichki ishlariga chet elliklarning aralashuvi natijasidir, bu holat 40 yildan beri davom etmoqda”, — dedi Tojikiston prezidenti.
Emomali Rahmon o‘z mamlakati aholisi ham bunday fojiani boshdan kechirganini, “ya’ni 90-yillarning boshlarida chet el aralashuvi fuqarolar urushiga olib kelgani va uning dahshatli oqibatlari hanuzgacha sezilayotganini” eslab o‘tdi.
“Urush natijasida 150 mingdan ortiq fuqarolarimiz halok bo‘lgan, 50 ming bola yetim qolgan. Bunday achchiq tarixiy tajribani hisobga olgan holda biz hech qachon qo‘shnilarimizning ichki ishlariga aralashmaymiz. Shuningdek, o‘z qurolli kuchlarimizni hech qachon qo‘shni davlatlarga qarshi ishlatmasligimizni qat’iy ma’lum qilamiz”, — deya ta’kidladi Tojikiston rahbari.
“Biz hamisha qo‘shni davlatlarda tinchlik va barqarorlik bo‘lishini qo‘llab-quvvatlaymiz va ular bilan tinchlik, barqarorlik, do‘stlik va hamkorlik muhitida yashaymiz”, — dedi u.
Tojikistonda 22-iyulga o‘tar kechasi harbiy shaylikni tekshirish bo‘yicha “Chegara—2021” mashg‘ulotlari boshlandi. Ularda mamlakat Qurolli Kuchlari va kuch tuzilmalarining barcha bo‘linmalari ishtirok etmoqda, 230 mingdan ortiq odam jalb qilingan. Mashg‘ulotlar Toshkent vaqti bilan soat 04:00 da prezident Emomali Rahmonning farmoyishi bilan start olgan.
30-iyul kuni Rossiya va O‘zbekiston Surxondaryo viloyatida o‘quv mashg‘ulotlarini boshlaydi. Ularda qariyb 1,5 ming harbiy qatnashishi kutilmoqda. 5-avgust kuni esa Tojikistonning Xatlon viloyatida Rossiya, O‘zbekiston va Tojikistonning qo‘shma mashg‘ulotlari boshlanadi.
Mashg‘ulotlar Afg‘onistondagi vaziyatning keskinlashuvi fonida o‘tkazilmoqda.
Afg‘oniston hukumati kuchlari va “Tolibon” o‘rtasidagi to‘qnashuvlar AQSh o‘z qo‘shinlarini Afg‘onistondan olib chiqishni boshlagach kuchaydi.
Afg‘onistondan NATO qo‘shinlarini olib chiqish 29-aprelda boshlangan, AQSh va “Tolibon” o‘rtasida tuzilgan kelishuvga binoan jarayon kuzda yakunlanishi kerak. So‘nggi ma’lumotlarga ko‘ra, AQSh Afg‘onistondagi harbiy kontingentining 90 foizdan ko‘prog‘ini olib chiqib ketdi.
Germaniya, Italiya va Avstraliya esa Afg‘onistondan o‘z qo‘shinlarini olib chiqishni yakunladi.
Izoh (0)