Наманган вилоятининг айрим ҳудудларида 20 июль куни кучли жала кузатилди. Бу ҳақда «Дарё» мухбири Азизбек Абдувалиев хабар берди.
Вилоят ФВБ матбуот хизматига кўра, 20 июль куни соат 19.00 атрофида Қирғизистоннинг Жалолобод вилояти, Олабуқа тумани ҳудудидан Косонсой туманининг «Обод» маҳалласи ҳудудига чақмоқ-момақалдироқли булутли зона кириб келган.
Туманлардаги ФВБ Гидрометеорологик жараёнларга таъсир кўрсатиш бошқарув мониторинг станцияси томонидан дўл ёғмаслиги учун булут зонаси атрофига таъсир кўрсатилган.
Шунингдек, вилоятнинг Уйчи, Наманган, Тўрақўрғон тумани ва Наманган шаҳрида кучли жала ёғиб ўтди.
Ҳозирда Наманган шаҳри, Косонсой ҳамда Тўрақўрғон туманларида ФВБ кучлари иш олиб бормоқда.
«Фавқулодда вазиятларда давлат қуйи тизимлари, хусусан, вилоят ҳокими ва сектор раҳбарлари воқеа жойига чиқиб, зарур чоралар кўрилганини маълум қиламиз. Туманлардан сув тортиш ва бошқа қўшимча техникалар сафарбар этилди. Жабрланган, тан жароҳат олганлар йўқ», — дейилади вилоят ҳокимлиги ахборот хизмати хабарида.
Эслатиб ўтамиз, 13 июль куни ҳам Наманган вилоятининг Косонсой туманига сел ёпирилган ва табиий офат оқибатида 9 киши ҳалок бўлганди.
Изоҳ (0)