Namanganda kuchli jala kuzatildi. Do‘l yog‘masligi uchun bulutlarga ta’sir ko‘rsatilgan

Namangan viloyatining ayrim hududlarida 20-iyul kuni kuchli jala kuzatildi. Bu haqda “Daryo” muxbiri Azizbek Abduvaliyev xabar berdi.

Viloyat FVB matbuot xizmatiga ko‘ra, 20-iyul kuni soat 19.00 atrofida Qirg‘izistonning Jalolobod viloyati, Olabuqa tumani hududidan Kosonsoy tumanining “Obod” mahallasi hududiga chaqmoq-momaqaldiroqli bulutli zona kirib kelgan.

Tumanlardagi FVB Gidrometeorologik jarayonlarga ta’sir ko‘rsatish boshqaruv monitoring stansiyasi tomonidan do‘l yog‘masligi uchun bulut zonasi atrofiga ta’sir ko‘rsatilgan.

Shuningdek, viloyatning Uychi, Namangan, To‘raqo‘rg‘on tumani va Namangan shahrida kuchli jala yog‘ib o‘tdi.

Hozirda Namangan shahri, Kosonsoy hamda To‘raqo‘rg‘on tumanlarida FVB kuchlari ish olib bormoqda.

“Favqulodda vaziyatlarda davlat quyi tizimlari, xususan, viloyat hokimi va sektor rahbarlari voqea joyiga chiqib, zarur choralar ko‘rilganini ma’lum qilamiz. Tumanlardan suv tortish va boshqa qo‘shimcha texnikalar safarbar etildi. Jabrlangan, tan jarohat olganlar yo‘q”, — deyiladi viloyat hokimligi axborot xizmati xabarida.

Eslatib o‘tamiz, 13-iyul kuni ham Namangan viloyatining Kosonsoy tumaniga sel yopirilgan va tabiiy ofat oqibatida 9 kishi halok bo‘lgandi.