Қашқадарё вилоятининг Шаҳрисабз туманидаги Кўл қишлоғига сел келди. Бу ҳақда «Дарё»га хабар берган туман ҳокимлиги ахборот хизмати раҳбари Баҳодир Ҳалимовнинг айтишича, сел келиши оқибатида қишлоққа олиб кирувчи йўл 10 соат давомида ёпилиб қолган.
«Бугун (2021 йилнинг 20 июль куни назарда тутилмоқда - таҳ.) тонг азонлаб туманнинг тоғли ҳудудларида кучли ёмғир ва дўл ёғди. Натижада тўпланиб қолган майда тош зарраларининг сел тошқинида оқиб келиши Кўл қишлоғига олиб борадиган йўлнинг ҳолатига зарар етказди. Ҳамда йўлда қатнов тўхтатилди. Вазиятдан хабар топган туман ҳокимлиги зарурий техникалар ва ёқилғи маҳсулотларини воқеа жойига юборди», — дейди ҳокимлик ахборот хизмати раҳбари Баҳодир Ҳалимов.
Таъкидланишича, селдан талафот кўрган йўлни таъмирлаш ишлари бугун, соат 15:00 га қадар давом этган. Унга қадар озиқ-овқатга эҳтиёж сезган фуқароларга озиқ-овқат маҳсулотлари ҳам топширилган.
«Соат 15:00 да вазият барқарорлашиб, йўл ҳолати яхшиланди ва автомобиль қатнови тикланди», — дейди ҳокимлик масъули.
Эслатиб ўтамиз, Қўл қишлоғи Шаҳрисабз тумани марказидан 86 километр узоқликда жойлашган бўлиб, қишлоқда қиш ойида икки метргача қор ёғиши кузатилади. Оқибатда эса қишлоққа олиб кирувчи ягона йўл 10 кунлаб ёпилиб қолиш эҳтимоли бор.
Мавзуга доир:
- Фоторепортаж: Қишда 10 кунлаб дунёдан узилиб қоладиган Шаҳрисабздаги Кўл қишлоғида бир кун
- Қор ёғса, ташқи дунёдан узилиб қоладиган Шаҳрисабзнинг Кўл қишлоғи учун қишгача йўлтанламас тез ёрдам машинаси олиб келинадиган бўлди
- Қор ёғса, ташқи дунёдан узилиб қоладиган Шаҳрисабздаги қишлоқ аҳолисига ваъда қилинган йўлтанламас тез ёрдам машинаси топширилди
Изоҳ (0)