Хитой ҳукумати маҳаллий Sinopharm компаниясининг фаолсизлантирилган вакцинасини 3—17 ёшли болаларда фавқулодда қўллаш учун маъқуллади, деб ёзади «Коммерсантъ».
«Beijing Institute of Bilological Products томонидан ишлаб чиқилган COVID-19’га қарши фаолсизлантирилган вакцина 16 июль куни 3—17 ёшдаги болаларда фавқулодда қўллаш учун маъқулланди», — дейилади фармацевтика компаниясининг шўъба корхонаси China National Biotec Group хабарида.
Клиник синовларнинг биринчи ва иккинчи босқичи натижаларига кўра, синовда иштирок этган 3—17 ёшли болаларда эмланишдан кейин антитаналар ҳосил бўлиш даражаси 100 фоизни ташкил қилган, антитаналарнинг ўртача геометрик титри эса деярли катталардагидек бўлган. Дори жиддий ножўя таъсирларни келтириб чиқармаган. Синовнинг баъзи иштирокчиларида ҳарорат кўтарилган ва укол жойи оғриган.
Буюк Британия ҳукумати эса болалар ва ўсмирларни коронавирусга қарши оммавий эмлашдан воз кечди. Фақат маълум бир гуруҳларгина вакцина олади.
The Telegraph газетаси маълумотларига кўра, Вакцинация ва иммунизация бўйича бирлашган қўмита эҳтимолий хавфлар ҳақида қўшимча маълумотлар олинмагунича, барча болаларни эмламай туришга чақирди. Бунинг ўрнига, COVID-19’га чалиниш хавфи бўлган (хавф гуруҳидаги катталар билан яшайдиган) 12—15 ёшли болаларни ҳамда уч ойдан кейин 18 ёшга тўладиган ўсмирларни эмлаш таклиф этилмоқда. Улар Pfizer/BioNTech вакцинаси билан эмланади, у Британия дорилар айланмаси устидан назорат бошқармаси томонидан шу мақсадлар учун тасдиқланган эди.
Ушбу қарор ҳақида расман 19 июль, душанба куни эълон қилиниши кутилмоқда.
Изоҳ (0)